Endacòm mai N°3

Se picatz dessús la primièira pagina auretz lo document en PDF e lo poiretz teledescargar.

Endacòm mai N°1

 

L’IEO nacional comunica
L’amassada generala de l’Institut d’Estudis Occitans se debanarà lo 7 e 8 de mai a Clarmont d’auvernhe. I sètz convidats mas perqué ? Quand qualqu’un aderís a una associacion afiliada a l’IEO – un cercle local o una seccion departamentala –, l’aderent es, segon los estatuts de l’associacion, membre de drech de l’IEO.
L’IEO a per tòca de representar la totalitat dels aderents de las associacions afiliadas e de far d’accions per la lenga e la cultura occitanas al nivèl d’Occitania tota e al delà (França, Union Europèa, organizacions internacionalas). Participar a l’amassada generala es s’assabentar de l’anament de l’IEO e de son malhum, discutir e decidir collectivament de sas accions a venir, elegir los membres de son conselh d’administrators.
De mai, la seccion de Puèi-de-Doma, qu’aculhís l’AG aquesta annada, a previst qualquas activitats festivas. Lo programa de l’AG e las informacions practicas per i participar son disponiblas sul siti de l’IEO : https://ieo-oc.org/
Podetz pas venir ? Podetz totun participar en donant poder a un autre aderent de l’IEO per vos representar. Tanben, sul site ieo-oc.org, podetz picar sus «Participer» puèi seguissètz las instruccions per donar lo poder (avètz pas res de pagar).

L’IEO es a sortir lo numerò novèl de «Anèm ! Occitans !», la revista istorica de l’IEO. Las dificultats creissentas de l'IEO dempuèi 2020 ressontiguèron naturalament sus la pareguda de nòstra revista Anèm ! Occitans ! Se pervenguèt a mantener una parucion espacejada per numeròs dobles, mas finiguèt qu'aquèla parucion se copèt amb lo n° 172. Conscient qu'un ligam d'aquela mena es a l'encòp indispensable coma pòrta-votz de l'IEO e coma expression collectiva de nòstre malhum, lo novel conselh d'administracion decidiguèt de tornar prendre la publicacion, escomesa malbiaissuda en l'absencia de tot equipament desvolgut e de la desseparacion geografica de la novèla equipa de redaccion. Enfin, aprep un long moment d’abséncia de parucion de la revista, lo n° 173 es a l'estampaire e lo deuriatz recebre lèu.

Pour Que Vivent Nos Langues (PQVNL), collectiu d’actors associatius de defensa e de promocion de las lengas territorialas de França, que l’IEO ne fa partida, a questionat los candidats a l’eleccion presidenciala.
Las responsas dels candidats : https://pourqueviventnoslangues.jimdofree.com/ PQVNL recampa un fum de lengas de França : alsacian, breton, còrse, flamenc, occitan, euskara, arpitan de Savòia. Rapòrt a PQVNL, mai d’informacion sul site ancian : https://pourqueviventnoslangues.com/.
 

CPLO (Congrès per la lenga occitana). L’IEO es membre fondator e membre institucional del CPLO. (L’IEO balhèt notadament al CPLO de diccionaris qu’aviá editat). La tòca del CPLO es de provesir lo monde occitan amb d’aisinas informaticas. Lo darrièr esplech provesit es un util de sintèsi vocala : https://votz.eu/. Pegatz un tèxte e lo logicial lo legirà.

 

Los membres de l’IEO comunican

IEO 63 «Parlem !» es la revista occitanista auvernhata e velava, es pareguda. Lo numerò de la prima 2022 parla de l’actualitat de l’Ucraïna. Tanben : poèmas, tèxtes literaris, un omenatge a Pèire Boissièra. Un rendetz-vos es donat al fin del mes de mai per una virada en Ardecha que se farà rescontrar de monde de tots los despartaments de la novèla region.

Lo site de l’IEO Auvèrnha Ròse-Alps (ARA) es aquí : https://www.ieo-ara.com/. Universitat Joan Jaurès, Tolosa. Océane Zerbab, membre de l’IEO, es una estudianta del master Estudi e

valorizacion dels patrimònis occitan e catalan (EVOCA), percors recèrca. Participa a l’animacion occitanista de l’Universitat. Amb l’associacion Òsca, ven d’acabar la quinzena occitano-catalana : bal, concèrt etc.

 

Librariá occitana de Tolosa. Marion Laignelet passa a una novèla estapa professionala e daissa la librariá

«Tuta d'òc» a Tolosa. Joan-Francés Poma prendrà lo relai. La Tuta d'òc foguèt una creacion de l’IEO31 jos la direccion de Joan-Pau Becvort. S’i fa de venda de libres mas tanben d’animacion culturala e de rescontras umanas :«Trabalhar a la Tuta foguèt per ieu una experiéncia de las bonas que siá coma librària o coma militanta per la lenga occitana. Lo mond occitan e mai precisament lo dels libres (e tanben los artistas de segur) es d'una riquesa estonanta e las e los que fan viure la lenga son de personas formidablas que soi estada plan contenta de rencontrar.»

 

IEO 06 comunica sus la dubertura d’una pàgina Facebook qu’a per nom «Lo Blagaire de l’IEO-06». Es una pàgina dont s’atròvan de proverbis, de dessenhs umoristics, de sentenças amusanti. Mercé a la sòcia Anna- Maria Milardi. Per véser qualques dessenhs umoristics : http://ieo06.free.fr/.

 

Far escala a Seta (34). Au convit dau cèucle setòri, los cercles d'Erau fan escala a Seta dau 12 au 18 d'abriu, e per l'ocasion los Setòris, que fan pas jamai las causas a mitat, convidèron quauques batèus de vèlas... E son un manat de 300 000 personas qu'ausiràn cantar en lenga nòstra, que se poiràn assabentar sus las associacions occitanas.

Per saupre tot : https://ieoerau34.blogspot.com/search/label/Ceucle%20Set%C3%B2ri

 

Fogal rural de Vaquièrs (31). Fa pauc, joan-Miquèl Destacamp (IEO31) convidèt «lo teatre del Trastet», un grop occitanofòna de Crayssac (Olt). Joguèron «Mongevavol» en occitan, una brava istòria de castèl desrocat, de familha arroïnada e d’uissièr que pica a la pòrta.

 

Bordèu. Un dimenge per mes (d’abriu a setembre), L'Ostau Occitan seccion de l’I.E.O. pel despartament de Gironda organiza una vesita guidada de Bordèu-la-gascona per vos menar dens las ruas a la recèrca de nòsta lenga e de nòsta cultura.

Per ne’n saber mai sus L’Ostau Occitan – seccion de l’IEO per lo despartament de Gironda :

http://ostau-occitan.org/ Per se marcar a las vesitas : guide@ostau-occitan.org

 

Castres (81). Una conferencia amb Bernard Vernhières se debanèt lo 10 d’abrial : "Louisa Paulin au travers de sa correspondance avec l'abbé Joseph Salvat : un triple itinéraire poétique, linguistique, intellectuel".

Bernard Vernhières es administor de l’ostal Azalaís, lo cercle occitan del país de Castres.

Per saupre mai sus Tarn : http://ieo-tarn.org/

 

Hérault de choeurs (34) lo dimenje 22 mai, un festenal que recampa mai de 60 còrs del departament dins lo parc del château d’O à Montpelhièr. Nadalenca serà presenta e cantarà d’estraches de son futur

espectacle concert resistencias II. https://nadalenca.fr/

Contactes IEO :
contacte general e administratiu : direccion@ieo-oc.org / tel. 06 34 16 63 90
Contacte Endacom mai : ieo.endacommai@gmail.com
site general : https://ieo-oc.org/ site edicion : https://ideco-dif.com/

AG IEO Nacionau

 L'amassada generala de l’IEO los 7 e 8 de mai 2022 a Clarmont d’Auvernhe
Après la tenguda d'amassadas generalas a l'automne per causa de pandèmia en 2020 e tornar 2021, l’Institut d’Estudis Occitans renosa amb la prima per nòstre acamp d'aquel an. Convidada per l’IEO de Puèi-de-Doma, l’AG tendrà luòc – aprep doas annullacions – a Clarmont d'Auvernhe (Clermont-Ferrand) per la dimenjada dels dissabte 7 e dimenge 8 de mai venents. L’amassada generala es dubèrta a tots los aderents, personas fisicas e moralas (associacions aderentas) al jorn de lor cotisacion. Cada aderent a una votz e pòt, en mai, èsser mandatat per 10 autras personas.
La darrièra amassada generala, que se debanèt al mes d’octòbre a Tolosa, era una amassada de crisi, emb l’abséncia de subvencions de l’Estat coma de las regions occitanas, e la partença del director. Una novèla organizacion de trabalh es estada mesa en plaça pel conselh d’administracion e lo burèu, amb per prètzfach d’assegurar la continuitat de las activitats de l’IEO, restablir tant coma possible l’equilibri financièr, e pausar las basas d’un desvolopament futur. L’amassada generala serà l’escasença de far lo bilanç dels mes passats e de definir son orientacion a venir. Lo principi foguèt votat a l’AG de Tolosa de metre en plaça una « conferéncia dels presidents de seccions departamentalas » per mièlhs associar lo nivèl departamental al trabalh del conselh d’administracion de l’IEO. Una sesilha serà consacrada a l’AG a la mesa en plaça d’aquela conferéncia (organizacion e biais de trabalhar, liam emb lo CA e l’AG de l’IEO...). Tots los presidents son ben-segur convidats a i participar per exprimir lor punt de vista sus aquel projècte. De mai, lòrs de l’encontre entre l’IEO31 e lo CA de l’IEO foguèt sugerit de tornar organizar una amassada dels salariats de l’ensemble de las seccions afiliadas a l’IEO, un punt a discutir a l’AG.
Lo CA de l’IEO es elegit per dos ans. Alavètz, l’AG venenta es pas una annada d’eleccion. Pasmens, lo CA elegit en 2021 es pas complet, e las candidaturas son dubèrtas per lo completar.
En mai de las sesilhas de trabalh, l’AG serà un moment de fèsta e de cultura gràcia a las activitats perpusada per l’IEO 63.

 

Luòc : la Capela dels Cordelièrs
La session se debanarà al centre de Clarmont d'Auvernhe, dins la Capela dels Cordelièrs (Chapelle des Cordeliers), 14 plaça Sugny. Se tròba sul costat dels immòbles del Conselh Departamental de Puèi-de-Doma, a mièg camin entre la plaça de la Victòria ont es la catedrala (en naut del puèi), e la plaça de Jaude, amb l'estatua de Vercingetorix (al pé del
puèi).  

En tram : Tram estacion Jaude, puèi pujar pel Balord Desaix entre l'estatua e lo Teatre, costat Teatre. En veitura : Parking josterran Jaude.

 
Programa previsionau
Dissabte 7 de mai
14h – 18h30 : primièra sesilha de l’AG
13h30 : Acuelh e inscripcion a la Capela dels Cordelièrs. Un dorsièr de benvenguda preparat per l’IEO 63 sirá remés als participants.
14h – 14h15 : dichas de benvenguda.
14h15 – 15h45 : presentacion e vòte dels rapòrts d’activitat e financièr.
15h45 – 16h15 : pausa
16h15 – 18h15 : sesilha de trabalh : las activitats de l’IEO
Presentacion per los membres del burèu de la situacion actuala de l’IEO, de son organizacion de trabalh e de sas activitats.

Discussion e orientacions per l’annada venenta. 

18h15 – 18h30 : candidaturas eventualas al conselh d’administracion. Clavadura de la sesilha.

18h30 – 20 h : sopar liure
20 h : serada festiva organizada per l’IEO de Puèi de Doma a la Capela dels Cordelièrs.
20h – 20h45 : « l'Ort dau Jan », film realizat per Gabrièu Chantelauze e Jan-Pèire
Lacomba.
20h45 – 21h45 : concèrt del musicaire Sourdure.

 
Dimenge 8 de mai
9h – 12h30 : segonda sesilha de l’AG
8h30 : acuelh a Capela dels Cordelièrs.
9h – 12 h 30 : sesilha de trabalh : l’organizacion de l’IEO
La conferéncia dels presidents de seccions departamentalas : prètzfach e organizacion
L’amassada dels salariats del malhum IEO : a tornar far ?
Sintesi de las orientacions per l’annada venenta.
Eleccion complementària al CA de l’IEO.
12h30 – 14h : dinnar liure
14h – 15 h : Passejada literaria « A Clarmont, suls passes de Joan Bodon » conducha per Joan-Peire Chambon, Clarmontés, especialista de l'òbra de Joan Bodon, que son darrièr roman, Lo Libre dels grands jorns, se passa a Clarmont. Lo RV per la passejada es plaça de Jaude còsta l'estatua de Vercingetorix.

 
Albergament
L'informacion generala sus las possibilitats d’albergament se pot trapar a l'Ofici departamental de torisme, plaça de la Victòria (www.clermontauvergnetourisme.com).
Albergament al Foguièr joves trabalhaires « Corum Saint Jean » : lo FJT « Corum Saint Jean », 17 rue Gaultier de Biauzat (en centre vila a 950 m de la capela dels Cordelièrs), pòt aculhir en cambras individualas e assegurar una restauracion lo 7 miegjorn e sopar, e lo 8 miegjorn. 

Tarifas cambras : 38 Є/nuèch (sanitaris individuals) ; 31 Є/nuèch (sanitaris collectius) ; repais (entrada, plat, dessert) de 6 a 10 Є. Per reservar :
www.corumsaintjean.fr. telefòn. 04 73 31 57 00. Se marcar lo mai lèu que possible.
Atencion : los oraris de servici dels repais son estricts : miegjorn 12h- 12h30, sopar 19h-19h30.
Per anar al Corum Saint Jean : segre la linha de tram dempuèi la pl. de Jaude (dir. pl. Delille) fins a l'estacion seguénta : pl. Gaillard, sortir de la plaça per la drecha (carrièra André Moinier) : la carrièra Gaultier de Biauzat es la primièira a man esquerra en davalar.

 
Poders
Se podètz pas èsser present a l’AG, es possible de participar en donant poder auna autre
aderent de l’IEO.

Endacòm mai - n°0

L’IEO es una organizacion bèla per de que recampa un fum de mond e d’associacions. Es tanben un embessonatge de grops sovent pichons, espandits de la mar granda als Aups. Es una associacion cambiadissa amb qualques personas conegudas e de monde que fan un passatge, de còps, cortet.
La tòca d’aqueste bulletin es de donar una visibilitat intèrne : dintre l’IEO, i a totjorn quicòm que se passa « endacòm mai ».
Per aqueste numerò d'ensag, levarem lo saile sus la còla del burèu, e las primièras informacions sul debanament de l’AG 2022. A mai i trobaretz lo comunicat del CA de l’IEO de febrièr de 2022.
Mas la comunicacion pòt venir de cada militant, de cada associacion. Alara esitetz pas. Tenetz nos al fial de vòstre viscut.
Contactes IEO :
contacte general e administratiu : direccion@ieo-oc.org / tel. 06 34 16 63 90
Contacte Endacom mai : ieo.endacommai@gmail.com
site general : https://ieo-oc.org/ site edicion : https://ideco-dif.com/

 
L’IEO nacional comunica
Composicion del burèu de l’IEO
Aprèp l’amassada generala de 2021, un CA de l’IEO se tenguèt lo 16 de novembre de 2021 per elegir lo burèu de l’IEO, qu’es constituit de 11 membres : 5 co-presidents e presidenta amb de competéncias particularias, mai una clavairitz, 2 vice-president e presidenta encargats dau secretariat e dau secretariat adjunt, a quines s’ajustan 3 personas.

 
Miquèu Arnaud es copresident, encargat de l’IEO-Difusion. Passionat per lei lengas es diplomat en lenga romanas. Sa conoissença de l’anglés, dau catellhan e dau portugués, l’a menat a trabalhar dins lo comèrciinternacionau. Sei viatges principalament en Euròpa au començament, se son orientats vèrs Africa puei, ont a poscut rescontrar de mond e de culturas diferentas. Totjorn afogat per la lenga occitana, a aprés lo provençau au licèu. A mes en practica l’apendissatge de la lenga quand s’es installat dins un vilatge ont la familha e lo mond parlavan normalament l’occitan. Es en fin de carrièra quand la situacion professionala es vengudada pus suava, que s’es mes a escriure novèlas e romans publicats, e es devengut president d’un ceucle locau, puei vicepresident de la seccion departamentala e a l’ora d’ara president de l’IEO Provença País aupenc, País niçard. Es l’autor de dos romans pareissuts dins la plega: Quora la matèria... (2017), Amontanhatge (2021).

 
Cristian Bonnet es copresident cargat de la revista «Anem Òc». Co fondator de l'IEO Gironda en 1968, foguèt de la cola que creèt lo CIRDOC. Trabalhèt coma MCF (mèstre de conferéncia) a l’universitat de Clarmont e venguèt president de l'IEO, region Auvernhe. Istorian de la literatura d'oc, recèrca e publica
textes desconeguts.

 
Esteve Ros es copresident, encharjat de l’IEO-Edicion, e fai partida de la comission de la revista «Anem Occitans !». Aderent de l’IEO Perigòrd (Novelum), participet a la fondacion de l’IEO Aquitània e ne’n fuguet lo president. Fuguèt secretari generau de l’IEO. Representant de l’occitan au comitat francés dau burèu europeu de las lengas mens espandidas (EBLUL-France), ne’n fuguet lo vice-president e secretari.
Inicialament veterinari de campanha, completèt sa formation emb un doctorat en fisiologia animala e un en filosofia. Es mèstre de conferéncia a l’universitat de Bordeu, onte trabalha sus la biologia de las malautiàs cardiovascularas, e los conceptes de foncion, normalitat e autoorganizacion daus sistemas biologics. «L'occitan e l'occitanisme, sei tombat dedins quante era pitit, en segre mon pair. Alaidonc, l'efiech es permanent.»

Eliane Tortet es copresidenta cargada de las relacions exterioras e dei relacions amb las valaas occitanas d'Itàlia, Fai part de la Comission revista «Anem Occitans !». De mestier es jornalista per França 3, per l'emission Vaquí e d'autras emissions de magazine. Originària de Droma provençala, longtemps sòcia de
l'IEO 26, l'es dempièi 25 ans de la seccion IEO 04-05. N’es la secretària e es engatjaa dins la difusion dau libre occitan tras l'Espaci Occitan dels Aups. Elegia comunala, delegaa per un pargue naturau regionau, sòcia dau Forum d'oc, dau CEP d'Oc, benevòle per leis estagis d'estiu dei Rescòntres Occitans en Provença.
«Ai personalament totjorn entretengut de relacions amb lo PEN-Club occitan, lo CAOC, l'AIEO, RPS e PQVNL».

 
Tederic Cahuzac es copresident, cargat de la conferéncia dels presidents de seccions departamentalas. 60 ans, gessit d'Acs (anciana capitala de la Novempopulania, venguda ducat de Gasconha a la fin de l'empèri roman). Psicològue de formacion (au Miralh a Tolosa), adara cargat de mission lengas regionaus en Gironda.
Estacat a las practicas sociaus que perméten un usatge de la lenga («cantèras» (coralas espontanèas en gascon), tauromaquia gascona, quilhas, danças gasconas dab, notadament, l'emplèc d'ua boha especifica de las Lanas de Gasconha, es ancian regent bilingüe en lengadocian de l'Agenés.

 
Isabela Mejean es clavaira. « Siáu tanben clavaira de l'IEO Droma (26) e viça presidenta de la seccion regionala ARA de l'IEO. Amb una formacion d’ingenior agronòme , siáu conselhera agricòla a la cambra d’agricultura de la Droma e trabalhe fòrça ambé lei vinhairons. Implicada dins la defensa de la lenga e la
cultura occitana, siáu tanben conselhera municipala dins ma pichòta comuna de St Restit. Faguère tanben de teatre en occitan ambé lo paure Rogier Pasturel.»

 
Marc Vidal es vici president cargat del secretariat e dels ligams amb lo nivèl francés (PQVNL) e internacional (ELEN). Marc Vidal faguèt d’estatistician (donadas multidimensionas), engenhaire CNAM, un moment cercaire en informatica puèi ensenhaire de cultura numerica (en IUT a Tolosa). Ara s'interèssa al contraròtle dels servicis de rensenhament en França. Es membre del CA IEO-opm e IEO 31 (dempuèi un bèl brieu).

 
Clamença Poujade es viça presidenta cargada del secretariat adjunt: «Soi doctoranta en Tractament automatic de la lenga occitana. Trabalhi suls parlars occitans d'Arièja. Soi anciana secretària de l'IEO09 e totjorn dins lo CA. Es totjorn estat una evidéncia per ieu de militar dins lo mitan occitan, de m'investir dins
aquesta causa que nos despassa».

 
Jaumelina Arnaud es membre del burèu. «Siáu administratritz encargada de la pichona enfança. Nascuda dins un pichon vilatge ont la familha e lo mond parlava encara lo provençau maritime mi senti pròchi d’aquestei lenga e cultura que son mei racinas, que son mon biais de viure. Clavairitz de la seccion regionala
de l’IEO Provença Pais aupenc Pais niçard e dau Forum d’Òc, m’ocupi tanben de la gestion de la librariá edicion e difusion de la seccion regionala e dau departement dei Bocas dau Ròse».

 
Pèire Brechet es membre del burèu, administrator cargat de GeoOccitania e del protocole de Donostia.

 
Alan Chambaraud es membre del burèu, administrator en carga d'Anem Occitans.

 
Amassada generala de l’IEO 2022
L’amassada generala venenta de l’IEO se debanará los 7 e 8 de mai 2022 a Clarmont d’Auvèrnhe (Clermont-
Ferrand). Lo programa de l’amassada generala e las informacions practicas per i participar sirán mandadas als aderents e serán sul site de l’IEO al començament d’abril.
________________________________________________________________________________
Los membres de l’IEO comunican
L’IEO 31 (Garona Nauta) a engimbrat lo prèmi Joan-Pau Verdier de la cançon occitana. Joanda amb «Sempre la vida» a ganhat lo prèmi 2021 . L’IEO 31 rescontra l’IEO Nationcal. Doas delegacions se recampèron a Tolosa lo 19 de mars.
L’IEO 09 (Arièja) eèra a Montsegur lo 16 de mars per commemorar lo chaple dels catars per l’armada des crosats catolics e francés. Aquela manifestacion reüniguèt los drapèus occitan e ucraïnian. L'istòria se repetís. Joan Marc Leclerc, president de l’IEO 31 e autor del libre «Ucraïna», cantèt una cançon ucraïniana.
L’IEO 09 recampa quatre cercles (Foish, Cercle deth Coserans, Pàmias, Pais d’Olmes). 

L’IEO 30 (Gard) a durbert son local Lo caire d'Òc a Nimes. Un fum d’activitats en cors (site ieo30.org)

A l’IEO 34 (Erau) fan la montada au mas de l’Estanhòl sus las piadas de Max Roqueta... e mai qu'aquò.
(https://ieoerau34.blogspot.com/)

 
Corrir per la lenga : La Passem! 2022 (dijaus 2 au dimenge 5 de junh)
600 km que's correràn, pendent 4 dias e 3 nueits, shens pausa ni cès. Per ajudar, òm pòt crompar de kms.
https://lapassem.com/oc/edicion-2022-2/
________________________________________________________________________________
COMUNICAT IEO- 10/02/22
En 2022 : una organizacion novela per l’INSTITUT D’ESTUDIS OCCITANS
Au mes de septembre passat, lo conselh d’administracion de l’Institut d’Estudis Occitans aviá alertat sus sas grandas dificultats d’organizacion e de finançament. Aviá apelat l’ensemble daus aderents a se mobilizar e
participar a l’amassada generala dau 17 d’octòbre de 2021 a Tolosa. La mobilizacion fuguet fòrça importanta amb 175 personas, presentas e representadas. La discussion se concentrèt sus la continuitat d’activitat de l’IEO en abséncia de salariat per lo manteniment de sas activitats. L’amassada generala adoptèt los principis seguents :
- favorizar la mutualizacion entre l’IEO nacionau e las seccions regionalas o departamentalas
- contunhar l’activitat d’edicion (IDECO)
- tornar assegurar la parucion de la revista Anems Occitans !
- organizar lo fonctionament dau conselh d’administracion en presenciau o a distància
- metre en plaça una conferéncia consultativa daus presidents de las seccions departamentalas
L’amassada generala a elegit a l’unanimitat manca 3 absencions un novèu conselh d’administracion que compren un burèu alargat. S’i apondon tanplan Michèu Nicolas (IEO Charentes) e los representants de cada seccion regionala (Michèu Arnaud, Joan Ros, David Lajudie, representant d'IEO-OPM)
Un CA se tenguèt lo 16 de novembre de 2021 decidèt la mesa en plaça d’una organizacion collectiva : lo bureu es constituit de 11 membres : 5 co-presidents e presidenta, (amb de competéncias particularias) mai una clavairitz, 2 vice-president e presidenta encargats dau secretariat e dau secretariat adjunt, a quines cal ajustar 3 postes especifiques.
Compausicion del Burèu de l’IEO:
• Miquèu ARNAUD : co-president cargat d'IDECO diffusion
• Christian BONNET : co-president cargat de la revista Anem Occitans !
• Tederic CAHUZAC : co-president cargat de la conferéncia dels presidents
• Esteve ROS : co-president cargat d'IDECO-edicion
• Eliane TOURTET : co-presidenta cargada de las relacions exterioras
• Marc VIDAL : vice-president cargat del secretariat e dels ligams amb lo nivel francés (PQVNL) e
internacional (ELEN).
• Clamença POUJADE : viça-presidenta cargada del secretariat adjunt
• Isabela MEJEAN : clavairitz
• Jaumelina ARNAUD : administratritz cargada de la pichona enfancia
• Pèire BRECHET : administrator cargat de GeoOccitania e del protocole de Donostia
• Alan CHAMBARAUD : administrator en carga d'Anem Occitans

 
La mesa en plaça d’una gestion collectiva, l’IEO fai veire sa volontat de contunhar son pretzfach per la lenga e la cultura occitanas.
En questa debuta d’annada novela, lo CA apela tots los aderents a manténer lor sosten a l’IEO e a tornar prene lors adesions pròchi sei seccions despartamentalas. Que l’annada 2022 siá una annada de reviscolada
e de novelum per l’IEO au servici de la lenga e de la cultura occitana.