La recèpta vertadièira de la chichomèia mesòia

 

L’UÒLH DEL BUÒU

LA BILHÈTA DE L’IVONA DEL CERCLE OCCITAN DE MÈSA

 

Per parlar de quicòm mai que d'aquela calamitat – la que quand se'n va, sembla que se'n tòrna - es a dire LA COVID 19, lo melhor es d’anar se regaudir amb çò qu’avem totjorn conegut : las bonas causas de la vida, e d’anar s'i refugiar coma dins las fardas de sa maire en cas de nafradura. Vòli parlar de la cosina. Sason après sason, trapar los produches del moment es un plaser real.

 

Pr’aquò, uèi vos prepausi una recèpta de fin d’estiu, la chichomèia :

 

Per far una bona chichomèia

Se cal levar de bon matin,

Preparar lo pastís, l’aiga fresca,

Bracejar en fasent de molins.

A qu’es bona la chichomèia,

A mon dieu qu’aquò’s bon ¡

 

Çò que cal :

Carn salada o cambajon

De cèba e d’alhs

Merinjanas (vièts d’ase)

Tomatas maduras

Sal – pebre – pimenton o tabascó– un sucre.

 

Quant ne cal ?

A vista de nas

 

Cossí far  ?

Dins una padena, far revenir la cèba e lo cambajon o  la carn salada dins d’òli cauda. Puèi, los alhs.

Apondre un molon de merinjanas copadas en rodèlas. Van fòrça redusir. Tant plan i aurà besonh d’apondre d’òli. Bolegar. Puèi levar la pèl de las tomatas. Cadun sap que pr’aquò, lo melhor es de las daissar un pichon moment sul fuòc dins l’aiga que bolís. Levar las granas. Copar las tomatas en pichons bocins et las vojar dins la padena. Apondre lo sucre. Un pauc de sal (mèfi a la carnsalada), de pebre e un pauc de pimenton o de tabascó. Mesclar tot aquò.

 

Daissar redusir un bon moment et vaquí qu’es lèsta. Es per aquò que se cal levar de bon matin…

 

I a de mond que meton de cogorletas o (e) de pebrons. Cadun fa a son gost, s’agís que siá famós, mas aquò es pas la chichomèia vertadièra d’aicí.

 

De tot biais, un pichon rosat plan fresquet acompanharà aquel plat amb bonaür.

 

Lo talhièr de cosina del Cercle Occitan de Mèsa a realisat la recèpta d’aicí e lo mond l’an trapada  plan bona.

 

Bon apetís a totes los que l’ensajaràn.

 

A qu’es bona la chichomèia

A mon Dieu qu’aquò ‘s bon….

 

Yvonne BEAUME.

 

Mèsa lo 9 de setembre de 2020.