La cronica Midi Libre dau Joan Loís Blenet
Es lo polit títol d’un libre novèl de Miquèla Stenta, coneguda coma especialista das trobadors e de lor temps. Mas es d’un subjècte plan d’ara que tracta aquel Negrelum dins una lenga clara, neta e fòrça rica (a la mairolièra !). Es lo relat de l’acompanhada de la maire en fin de vida fins a l’EHPAD finau. Amb una precision clinica per dire un viure que ven de mai en mai materialitat penosa, es d’un registre qu’i sèm gaire acostumats en lenga nòstra. Stenta, sens defugir res, capita que, se la legida es ispra, siá jamai pesuga nimai laianta. Temps de silencis, remembres, dialògs mai o mens capitats, pintran una relacion longament tibada. Puèi, la mòrt passada, es un trabalh remirable de prigonda compreneson d’una personalitat dins las endevenenças d’una larga vida setòria. Lo retrach d’una volontat capuda de dignitat pel quotidian rufe d’un pòble per quau cada sòu compta.Vaquí un grand pichòt libre. Es publicat amb la revirada per l’Aucèu Libre, ostalòt d’edicion que fa un trabalh de tria, amb l’originalitat de publicar dins las doas grafias de l’occitan, tant la classica d’aquesta cronica, coma la mistralenca. Gaireben 70 títols, totes al format pichon, gròs gaire ben coma un telefonet. A la pòcha vos faràn l’alternativa au pivelatge d’internet que nos clava de tròp.
Traduction à retrouver sur Midilibre.fr
Cap comentari:
Publica un comentari a l'entrada