AL PAÍS DELS PARLUFIÈRS
Amb lo montairon d’informacions del finestron o dels rasals a-socials, es pas mai possible de destriar las vertats vertadièras de las falsas vertats. Los messorguièrs pòdon proliferar… Nos demòra aquesta croniqueta per espepissar l’anar del monde d’un biais critic e destriar lo perqué del cossí e lo coma de jos lo coissin !
• Intronizacion : Ai pas capitat de comprene (deviá semblar una evidéncia a tot lo monde, levat per ieu) perqué l’intronizacion del president dels Estats-Units se faguèt a Tolosa : al… Capitòli !
• Lengut : Lo ministre Blanquer a la discutida d’una lei sus las lengas de França al Senat en decembre : «Ieu que vos parli, ai d’ascendéncias alsacianas, catalanas, bretonas. Mon reire-papeta cambièt de lenga mai d’un còp e daissèt Alsàcia per contunhar de parlar francés. Me soi marcat a una espròva de breton al bachileirat e lo catalan es plan simpatic (Nòta : e los locutors de las autras lengas sèm antipatics ? Cossí se mesura la simpatia d’una lenga alara que caduna es per dire lo monde dins sa totalitat ?). Mas ministre, sens èsser oblijat de jogar lo ròtle del jacobin reguèrgue (* : de qué seriá se l’èra, reguèrgue ?), totjorn sus la defensiva, devi èsser lo garant de l’interés general. » E doncas, se comprenèm plan, l’interès general es de se desinteressar del sòrt de las lengas minorizadas ?
• L’ecologista verd-clarinèl : Avèm un president ecologista de primièra que va saludar lo ròtle del nuclear coma energia verda ! Trapa totjorn una bona-plan marrida rason per contunhar d’escampar de pesticidas. Pas possible de téner l’engatjament de remplaçar los orses que morisson dins Pirenèus. Las datas d’interdiccion recuolan de longa ; la tièra de ciutadans convencionats romega sul non-engatjament o lo desvirament rapòrt a las proposicions faitas… Mas tot va plan : se marcarà dins la Constitucion que França òbra contra lo rescalfament climatic ! 4 o 5 mots per una engana de primièra…
• Dètz minutas de tròp : Dins l’una de sas nombrosas presas de paraulas, lo Primièr ministre de França, lo Joan Castèx, tenguèt unes prepaus que nos atristan e nos daissan bravament malcorats. Aquí çò que diguèt : « Se jutja pas una partida que va durar nonanta minutas al cap de doas segondas. ». Òc, avètz plan legit : nonanta ! E pas, coma cadun ba sap, las quatre-vints minutas reglamentàrias que dura una partida de rugbí (a XIII tanplan coma a XV). Declaracion vergonhosa per un enfant de Gasconha e conse d’una ciutat catalana : es pas lo tot de se faire tractar de « primièr ministre a l’accent de tresena mièg-temps » per la premsa parisenca (plan contenta de la metafòra fobalistica) ; apuèi, cal assegurar e ligar la dimension rugbistica al cant de las cigalas e a las aigas rajant suls codolets ! Cal pas renegar las rasigas ! E somiam del jorn, ont en plaça de clavar una declaracion per « Vive la République ! Vive la France ! », lo president o lo primièr ministre saludaràn los ciutadans d’un : « Lo XIII, aquò òc ! ». Somiam…
Parlufet Roch
Cap comentari:
Publica un comentari a l'entrada