La guinhada de l'IEO d'Erau
sus RÀDIO LENGADÒC
(Picatz sus l'imatge, i tombaretz)
Una bilheta, un agenda suls eveniments portats per los cercles d'Erau. (Quand n'i aurà...)
Diga ! A la
debuta dau rambalh virava per lo net una galejada misogina que daissava
entendre qu’èran las femnas qu’inventèron un virus que capitèt d’arrestar lo
rugbí, de barrar los cafès e de téner l’òme a l’ostau… Èra lo temps benesit que
lo masclum masclista s’escalasava.
Puòi, quand vegèron
que lo mascolhonatvirus tocava una proporcion mai bèla d’òmes que de femnas
riguèron pas que d’una gauta, los òmes.
Ara, se rison pas
pus. Un estudi plan seriós ven de demostrar que se jamai lo malaute mascle se
ne sortís son espèrma demòra, ad vitam aeternam, portaire dau
taplancolhonatlovirus.
Vòls que te
diga ? I anam drech. Deman grèva mondiala de l’amor que las femnas
pas baujas voldràn pas se faire empegar per un òli de bragueta de maissanta
cuòcha.
Per apasimar una
situacion de las mai tibada, los govèrnaments de totes los países acampats
decidiràn enfin un confinhament novèl per los mai violents que respectaràn pas
lo refús e l’integritat de sas companhas: aniràn faire un torn jos la docha a
la preson de Magalona, o d’endacòm mai, per s’apasimar la sang entre eles. E
van saique decidir tanben, es a mon sens una question de minutas, de promòure
l’Amor Cortés e, mai que mai, l’Amor de Luònh dau paure nòstre Jaufré.
Per decision de
l’OMS la lenga qu’inventèt aquelas Amors serà dins pas gaire sola lenga
oficiala mondiala. Es una question de santat publica !
Enfin, per çò que
ne dise…
Cap comentari:
Publica un comentari a l'entrada