PAPIERÒT MENERBÉS (in La Semaine du Minervois, 17/06/21)

• Un conte ecologic : L’Oliu del giratòri

 

La narbonesa Annick Jahan a escrit un conte ecologic en francés L’olivier du rond-point, un libre que s’adreiça mai que mai als 9-12 ans mas tanben a totes los que s’interèssan al sòrt dels olius transplantats. Lo libre es disponible tanben dins una version anglesa e, ara, dins la version occitana L’oliu del giratòri, mercé a la revirada fornida per l’Institut d’Estudis Occitans-Aude.

En 24 paginas, dins un format carrat (21x21 cm) amb d’illustracions (dessenhs de Paul Reig e aqüarèla de Cecilia Puig), seguissèm las aventuras de Pablo (es lo pichon nom de l’oliu andalós que li arriba, un còp l’autre, de daissar escapar unes mots dins sa lenga mairala).

« M’an plantat aicí al mièg d’aquel giratòri ont milierats de veiculs de tota mena se preissan en grand tarabast, en redond, s’agís d’una ronda ? Curiosa ronda ! Sonòra, bronzinanta e que pudís… Mon exili… aqueste cercle de missanta tèrra ont los òmes vestits de jaune fluò an escampat, d’aquí entr’aquí, unis blòcs de pèira que fan mina de me protegir de las veituras calugas e retenon coma pòdon lo sòl a mas rasigas. » 

I agèt lo viatge ont los olius promeses a se ganhar una copa bonsaï dins las jardinariás crosavan los camions d’avets d’Escandinavia venguts « festejar » Nadal : « Jol pretèxte del rescalfament climatic, un fum d’espècias vegetalas, e de còps animalas, se tornan trapar dins unes endreits ont procuran l’exotisme recèrcat. Atal, una franja de palmièrs servís de totèm exotic al centre del jardin d’una ostalariá bèla dins una província alemanda » . Los emplegats de la Comuna, amb lor malhòt jaune (« lemons sus patas »), li fan plan de misèrias. Demanda a sa passatgièra clandestina, una migala, d’anar véser endacòm mai qu’el crenta la ventòrla. 

Mas aquel drollet que passa amb son amic a bicicleta, que s’arrèsta, qu’ensaca sas olivas e que vòl faire venir son papeta, un especialista de la preparacion de las olivas de taula, lo poirà salvar e lo tirar d’aquel giratòri sens èime ?

 

• L’An Demain (www.landemain.fr) , de la librariá a l’edicion : L’editor de L’Oliu èra d’en primièr una librariá setòria especializada dins l’ecologia e las alternativas. A costat, se lancèron dins l’edicion. Dempuèi lo 1èr de genièr, lo trabalh editorial es vengut prioritari e la librariá (5, cai d’Argièr a Seta) es dobèrta solament lo dissabte e reçauprà, de temps en temps, unes rescontres-discutidas.

Entre los libres editats, de notar : la parucion a la tardor de 2020 d’un libre de Jean Brunelin, vertadièra enciclopedia gostosa de la cosina tradicionala setòria : La cuisine sétoise ; un libre plan utile en aquesta annada del centenari de la naissença de Jordi Brassens : Georges Brassens Pas à pas, petit guide (très orienté) de Sète, co-signat per dos Bernats : Lonjon e Wagnon.

Picholin Roch

• Se pòt comandar lo libre L’Oliu del giratòri a : IEO-Aude BP 51042 11860-Carcassona Cedex : 10 € (+ 3 € de pòrt)