GERMANA E LAS MARCEJADAS
Qu’es aquela tissa menada amb perseverança de voler anar faire una virada sus Març (e vos parli pas d’aqueles que se vòlon metre sus lor 31 e s’i anar installar) ! I van dins un esperit batalhièr (vertat que Març èra lo dieu latin de la guèrra, un bon A-res estimavan los Grècs !) o per lipetariá (Mars es lo nom d’una barra de chocolat, non) ?
A Març, los Romans i avián dedicat lo primièr mes de l’an, aquel que vei lo retorn de la prima e ont los tarrencs tornan soples : un plaser per i caminar e avançar a pè o a caval, sus una polida e verda pelena (levat se s’i debanèt una partida de XV la dimenjada passada), amb quauquas floretas (pimparèlas, primadèlas, captòrtas,…) per tornar prene l’activitat maja : la guèrra. En occitan de trobador aquò se ditz e s’escriu : « E platz mi quan vei per lo pratz / Tendas e pabalhos fermatz. / E ai grant alegratge / Quan vei per champanha renjatz / Chavaliers e chavaus armatz. » (L’alegria me ven quand vesi pel campèstre cavalièrs e cavals armats). Aqueles vèrses son de Bertran de Bòrn, senhor en Peiregòrd, plan conegut vist que lo quite Francís lo cabrièr lo cita dins sa cançon Rockstars du Moyen Âge. Tant qu’a i èsser, coma l’òme es un lop per l’òme, los estatjants de la vila als sèt sèrres estimavan que Març èra lo paire de Remús e de Romulús que nasquèron fa plan temps, mas ja èra pas mai l’alba de l’umanitat.
Lo president de l’Elisèu ne dormiguèt pas de la nuèit : pensatz, una camèra qu’estima francesa (mas de fait concebuda dins la capitala occitana) nos manda imatges de la planeta lonhdana. E de faire lo fièr, de se montar lo babaròt, de se’n creire ! Alara qu’es una recuolada bèla : al país ont los fraires Lumière inventèron los imatges que bolegan, vaquí qu’òm es content del trabalh d’un aparelh que fotografia de calhaus ! Lo retorn en rè scientific es plan bèl !
Se pausa tanben la question de las finanças : aquela expedicion es un biais bèl d’escampar la moneda per la finèstra. Sabèm plan qu’un viatge sus Març còsta pas de milions de milions de sòuses. E aquò tot lo monde l’a vist (o traparetz los imatges sus Vòstre-Tudèl) : la Germana se pagava lo viatge sus Març, amb de bravonets òmes verds aimables coma tot, per quauques quilòs de pasta. D’unes cercaires del país estiman que Lustucrú aviá panada l’idèia a la familha Bareil de Vilaspin (e sas vironas, crèstas, dentèlas, brandilhas, cauquilhas…). Nos demorariá de verificar se los Marcians parlan francés o occitan, mas la NASA a pas botat l’estudi al programa de la mission actuala !
E nautres sabèm plan que los Marcians mandèron una expedicion en Lengadòc per çò que, s’avètz plan escotat lo son que nos an vendut coma extraordinari del vent sus la planeta celèsta, pensi plan qu’avètz reconegut qu’èra una… virada del Cèrç. Ara, demòra de saupre s’aquel enregistrament los extra-terrèstres lo faguèron a Marselheta o a Marselhan, amb una possibilitat que siague a Nòstra-Dòna de Marcelha a Limós !
Marcista Roch
Cap comentari:
Publica un comentari a l'entrada