La guinhada de l'IEO 34 !
sus RÀDIO LENGADÒC. (Picatz sus l'imatge, i tombaretz)
Diga ! Dins la mala fortuna dau moment, las lengas veson tanben espelir variants nombroses. E amb l’amic Miquèl, nos sèm pensats de vos recampar mots novèls candidats per los diccionaris de deman. Vejatz-ne aquí un planponh :
Primièr, d’aquela passa conoissèm totes l’èrgasme qu’es lo contentièr dau sègle XXI, un grand gaug sentit quand descargam la masqueta après aver de còps que i a, solet a l’ostau, solimasquetat un temps. E, que m’escampe la pèira aquel qu’a pas jamai practicat l’atestardatge, qu’es de faire l’atestacion alara que sèm ja per carrièra dins lo plen dau cobrifuòc.
D’unes, mascalponh, masqueta tenguda a la man o mascaràs, masqueta portada jot lo nas per s’autobugar pas las lunetas, se retroban dins de clubsters que son de luòcs suaus per faire de rencontres e tòrnan amb un covichinèl dins la caissa. Lo covichinèl essent, o auretz comprés, un virus invasiu de las vias respiratòrias.
Vertat es qu’en França la masqueta es facultatòria, normalament facultativa mas venguda obligatòria e que n’avèm pas de besonh, que sèm totes mai o mens desconcertats que nòstres concèrts reservats un an a l’avança son estats anullats. E, me daissère dire qu’aquò se poiriá esperlongar, que segon d’unes expèrts, la durada de la pandemia serà de l’òrdre dau covidæternam.
Vos parlave l’autre ièr dau mascarèl de mascarèl ! qu’es una interjeccion grossièira que s’emplega quand l’elastic de la masqueta te peta mas sabètz benlèu pas qual es Penuritz? Penuritz es la divessa que tenon responsabla de la manca de vaccins... Levat per los comorbides, aquel l’avèm pas inventat !
Vòls que te diga ? Comorbide, aquò vòl dire que sètz coma flors dau mes de març e doncas que sètz pas luònh de tòrcer la mirgola. Alara direm : Itecovidest
Enfin, es çò que ne dise ieu…
La guinhada de l’IEO34. E, rau !
Trabalh collectiu menat per lo mèstre reviraire Miquèl Pedussaud e son gafet lo Dome.
Adobat d'un tèxte anonim en franchimand.
Cap comentari:
Publica un comentari a l'entrada