La guinhada de l'IEO 34 ! d'escotar sus RÀDIO LENGADÒC. (Picatz sus l'imatge, i tombaretz)
Diga ! Davant un govèrn que las volián elas tanben escanar, las lengas dichas anticas, mai que mai lo grèc, se venon de revenjar. L’OMS e la divessa Euròpa -tè ! encara un còp dels Grècs !- venon de decidir de tornar escaissar los variants amb de letras grècas. Aquò segur dins lo sol lagui d’estigmatizar pas, pecaire, las populacions que fan l’estrena de mudasons dau virus sempre mai ponchudas per enfectar la paurilha.
Vòls que te diga ? N’i a dau costat dau Conselh Constitucionau que van faire lo morre, la bèba de tres palms ; vòle pas èsser grossièr mas que s’anèsson far veire a cò dels Ellens e dels garçons ! Que, me daissère dire que la lenga grèca èra comola de signes diacritics, emai coma cau, a sacadas, ne te faguèron lo plen de Seta, los Grècs ! Mas nòstre papetum cambiarà pas un iòta a sa lei, tocarà pas d’un epsilon sa sacro-santa constitucion. L’article 2 bolegarà pas : « Lo virus de la Republica es lo virus chinés ». Pas mai. Los variants anticonstitucionals e sos noms forastièrs son pregats de dintrar e de demorar dins l’article 75-1 e de faire bona figura au patrimòni nacionau per la toristalha.
Siaguèsson pas estats a la ramassa coma per las masquetas o los vaccins, i aguèsse agut un variant francés, Betà seriá estat son nom, segur. Rai, se ne crese mon amic Pitaluga, aquel dau teorèma famós de la quadratura dels cercles occitans, tant que ne sèm pas a omèga es pas fotut per nautres. Mas que venga lèu aquel variant inesperat donar lo còp d’escoba necite dins l’epad dels Aissables de la Republica !
Ve! tè! sèm pas rancuroses. Lor pagarem lo Panteon…
Enfin es çò que ne dise, ieu…
La guinhada de l’IEO34. E, rau !
Cap comentari:
Publica un comentari a l'entrada