Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Cada annada se vei de mai en mai de pluèjas violentas (veire la setmana passada dins Gard e Erau e los mòrts negats dins mar) aprèp la secada de l'estiu.
Malurosament, aquò's de costuma dins la nòstra region mediterranèa, e de mai en mai cada annada !
L'òme es subretot responsable d'aqueles malurs : construccions d'ostalses a costat de ribièras, sus puèges amb fòrça betonatge...
L'aiga es plan poderosa ! Se pòt pas arrestar d'un còp de bròca magica e lo sabèm dempuèi d'ans e d'ans !
Alara cossí faire per arrestar aquel baujum ? Un fum d'associacions, de scientifics, de politics... ensajan de « faire bolegar » lo mond, de butar a la ròda , mas es pas aisit que la moneda pòrta mai d'un ! « Podèm bastir aquí, i a pas cap de problèmas sèm luènhs de la ribièra ! ». S'ausissiá mai d'un còp aquel rasonament, un còp èra, benlèu mens a l'ora d'ara (?) , mas cal encara caminar dins aquel trabalh d'informacion e de sensibilizacion !
L'aiga es tanben la vida : sens aiga pas ges de vida sus la nòstra Tèrra .
Aicí, dins « Còr d'Erau » avèm Lo Salagon, lo flum Erau, ribièras, lavanhas sul Larzac...
Mas jos la tèrra, dins las baumas i a d'aiga que les que los espeològues « cèrcan », estudian amb de còlas de scientifics. Aquí dins lo Lodevés, un trabalh de primièra es fach dempuèi d'annadas amb l'associacion « Larzac explo et Celadon » (veire amb Jean Camplo e Frank Vasseur siti:larzacexploceladon.fr) dins la « Bauma del Banquièr » a Sant Estève de Gorgàs. Ensajar de melhor conéisser lo « mond de jos la tèrra » (coma lo disiá Joan Bodon, dins los « contes del Drac » -veire al Cirdoc), plan utilizar aquela aiga per las generacions que van seguir, es un enjòc de primièra ! Se cal pas enganar de lucha : totis responsables per l'avenidor de la nòstra Tèrra !
Adieu, brave mond, a la setmana que ven e tenetz vos fièrs !
Cap comentari:
Publica un comentari a l'entrada