sus RÀDIO LENGADÒC. (Picatz sus l'imatge, i tombaretz)
Diga ! Vivèm dins un mond formidable ont las nòvas melhoras que nos arriban, son pas, fin-finala, que de « fake-news » coma dison en bon francés. Nautres disèm puslèu messorgassas o cracas. E los mai menturdasses son los mai nauts plaçats. Vos sovenètz : « sèm prèstes a tota eventualitat » ; « serà pas mai qu’una gripeta » ; « las masquetas servisson pas de res ! », « mestrejam la situacion » ; « los tèstes son pas necites ». E ara per ara : « aurem pro de vaccins per totes, tocarem lèu l’immunitat collectiva, seretz garits abans que d’èsser malautes, se rasa a gratís etc.. Ne vòls, n’as. Ausiràs çò que t’agrada d’ausir.
Vòls que te diga ? En mai d’aquò, son contagioses ! A son exemple, sèm venguts totes mai messorguièrs que la colleccion complèta dels armanacs setòris, sèm totes fòra-lei. E, es aquò qu’es bon fin finala dins aquela crisi ! Dau papeta que se passeja amb cinquanta atestacions -una dins cada pòcha de son pantalon de caçaire kaki, sovenir dau servici- a la bèla maire que recep clandestinament per lo ressopet sa familhassa ; dels fausses infirmièrs que te passèron davant au subremercat a aquel que va far riqueta, lo malaürós suicidari !, a cò dels amics un ser de cobrifuòc…
E ara, pompom sus Garona, per nos sauvar la vida mièlhs qu’una aiga-bolida, la societat franchimanda Aquò-sufís va fabregar una potinga americana dins una usina allemanda…
Me rementa lo temps que l’aramon dau papeta partissiá en cisternassa per melhorar lo bordèu… E uòi, nos parlan d’un confinhament ibrid ! Mas, los ibrids dau papeta partissián tanben a Bordèu… Tòrna-vira, vira-tòrna : es lo bordèl !
Enfin, es çò que ne dise ieu…
La guinhada de l'IEO d'Erau. E,.. rau !
Cap comentari:
Publica un comentari a l'entrada