dimecres, 22 d’agost del 2018

Marcamal se passeja


Als sòcis e associacions sòcias de l'IEO34,


sèm malcorats de vos faire assaupre que sèm forçats de nos desseparar, per rasons economicas, de nòstra directritz e amiga Ruth Kaiser. Es de plànher, mas los que balhejan ara las ajudas publicas regionalas qu'an normalament vocacion de sosténer la lenga e la cultura nòstra dins son espandiment e sa difusion an pas comprés l'interés de manténer aquel emplèc, nimai la necessitat d'una botiga de difusion occitana (libres e produches derivats) dobèrta au còr de Besièrs, dins un barri popular.
Volèm saludar e grandmercejar Ruth per l'òbra complit e son abnegacion a lo menar, de la creacion al manteniment d'aquel luòc de cultura e de convivéncia mas tanben detràs son taulièr, un pauc d'en pertot per lo país, de punta de clar a solelh colç, que vente, que plòga e que tomben de rabanèlas. Es una veirina sus un autre occitanisme que se tampa uòi. Ne sèm desconsolats e descorats.

Tenèm a mercejar e a rassegurar aqueles que fins a uòi nos an sostenguts, partenaris o personas, farem tot per esperlongar e manténer las collaboracions passadas. Lo CA de l'IEO34, cotria lo Centre cultural lo Camèl, son a obrar amassa per ensajar de trapar solucions, mai que mai a travèrs una ajuda militanta e benevòla. (Se nos volètz faire prodèl es l'ora de faire pinchon!) Ensajarem de tornar dobrir la botiga quauques oras per setmana a partir de setembre. La venda dels libres se farà tanben per correspondéncia, lo trabalh d'edicion va contunhar come de per abans, bailejat per Florian Vernet.
La tinada de 2018 ven de paréisser, (3 de 4: lo quatren deuriá pas tardar) Traparetz aquí lo ligam per badar, faire vòstras causidas e crompas.

De tot biais, nos daissarem pas tòrcer per una politica lingüistica nècia que nos va totes plegar! Lo prètzfach de l'IEO34 se va naturalament perseguir: ajuda als corses d'occitans e a las associacions sòcias. Lo site serà a cha pauc espolsat se nos volètz mandar las entresenhas necitas per aquò far, un blòg de comunicacion evenemenciala sus çò que portatz es a se metre en plaça. Tot serà a carrau per la dintrada.

Plan evidentament podrem pas téner pè a la bòla sens vosautres. Alara, vos mercejam per aqueles que l'an pas encara fach (tanben las associacions, ne manca fòrça aqueste an! Ont sètz?) de vos marcar a l'IEO per nos sosténer e faire avant.

Mercés.
las còlas dau CA de l'IEO34 e dau Camèl

Lo Jornalet faguèt resson a nòstre desaire, picatz sus l'imatge se volètz legir l'article. Mercés a eles!
https://www.jornalet.com/nova/10039/lieo-lengadoc-a-licenciat-sa-directritz-per-la-retirada-de-las-ajudas-publicas

Los mai legits