diumenge, 25 de juliol de 2021

Per sorire

  Lo sorire de la setmana amb l'IEO d'Erau. 

                                                        E,... rau !!!

 



 

dilluns, 19 de juliol de 2021

Per sorire


 Lo sorire de la setmana amb l'IEO d'Erau. 

                                                        E,... rau !!!


 

divendres, 9 de juliol de 2021

Aquí lo torn

 Jaurés e Lenina sus la rota dau torn 

                                                a Puòg Abon





dilluns, 5 de juliol de 2021

Per sorire

     Lo sorire de la setmana amb l'IEO d'Erau. 

                                                        E,... rau !!!




La Clubsterada de Rodés

 Diga ! I a pas besonh d’un sondatge Ipsòs que te costariá pel e borre, o d’un estudi sociologic sabentàs per constatar que la part màger das occitanistas son pas, e se vòlon pas far vaccinar.

De doas causas l’una : podèm imaginar que lo rendètz-vos estivenc de tot un pòble, a Rodés, venga aqueste an un total clubstum o una Clubsterada. Pensatz, se quauques variants exotics adelit e mal noirit, aflaquit per lo viatge, se ven renfortir en se barrejant amb un aligòt-saucissa o una escudelada de tripons, paure de nautres, serem fotuts, plegats e l’occitan desapareisserà a de bon e a tot jamai de la planeta…

Vòls que te diga ? Sabe pas perqué, preferisse la segonda ipotèsi que vaquí. Mauriceta, la Mauriceta primièira vaccinada de França, trabalha a la mòrt e los medecins d’analisar que l’ARN messatgièr que li inoculèron desborrona que mai. Comença de portar ont cau pas de paquets que son pas esperats e las cellulas de son còs fabrican a tòrt e a travèrs proteïnas a bodre, -ne vòs, n’as- mai que dins la glaira de l'uòu de la galina negra o dins una toma de rocafòrt. La Mauriceta es a las espèrras, va tibar lèu l’artelh e darrièr ela totes los paurucs creserèls que, ninòis, faguèron fisança als laboratòris e als govèrns dau mond tot.

E qual va demorar per bailejar França ? Un pòble reguèrgue, un pòble rebelut, un pòble reborsièr qu’aurà lèu fach de tornar a sa lenga la plaça que s’amerita, aquela qu’un còp èra civilisèt Euròpa.

Ane, vos desire un bon estiu e vaccinats o pas, espère vos veire un darrièr còp a l’Estivada.

Enfin es çò que ne dise, ieu…

La guinhada de l’IEO34. E, rau !
 
La Guinhada es sus ràdio Lengadòc. En picant sus l'image i tombaretz.

 
 

Abans l'Estivada

La trencadura d’estiu arriba. Es la vertadièra fin de l’an qu’a pas grand causa de veire amb localendièr oficiau. Una annada cargada amb un contraste totau per nòstras lengas istoricas. D’un costat una evolucion plan positiva de l’opinion que mostrèt la lei Molac e sos vòtes espectacloses. De l’autre una dobla destruccion deguda au ministre Blanquer. Dempuèi dos ans ne liquida l’ensenhament au licèu e atau n’arroïna la filièra tota. De mai, aprèp sa desfacha parlamentària activèt lo Conselh Constitucionau per enebir l’immersion, lo melhor metòde per fargar de parlaires de nòstras lengas. Situacion bufèca. Per las lengas l’Educacion de França a una celebritat mondiala de nullitat pedagogica. Es sempre en finala per ganhar lo Grand Prèmi de l’Ase en Lengas qu’es de grand prestigi. Capitada basada sus una règla geniala : « Aprene la lenga, jamai la parlar ». Atau interdiccion de parlar occitan a l’escòla ! Los deputats Euzet e Kerlogot elis partiràn pas en vacanças que devon trapar una solucion au desastre. 

Per vos, a la plaja, au maset, a la cabana, cargatz-vos de libres d’òc. L’IEO Edicion ven de sortir sa plega ‘A Tots’, 4 títols amb una autora novèla : la Bernadeta Romieu. E lo valent IEO d’Erau ne sortiguèt cinc. Demest eles un novèl de Joan Larzac « L’an que ven d’onte ven ».


Traduction à retrouver sur Midilibre.fr


 

PAPIERÒT MENERBÉS (in La Semaine du Minervois, 01/07/21)

 Lo papieròt de l'Alan Roch

Lo fuelheton de las masquetas se perseguís amb l’autorizacion de l’enlevar defòra, levat se siás dins un estadi, e de la gardar dins los magasins. Bon, probable que las règlas cambiaràn deman o deman passat. Pel moment, nos acontentarem de tornar descobrir que lo monde an tanben bocas per parlar, beure, manjar, potonar, mossegar ; e que lo nas servís per respirar. Una brava leiçon d’anatomia que n’aviam bravament perduda l’idèa. Çaquelà, demòra malaisit de faire la tria entre los mascats, los demascats e autres emmascats que d’unes s’amagan jos masquetas virtualas, falsas o, quitament, realas.

 Emmascats de primièra : Los membres del Conselh constitucional que sabon pas tròp cossi penjar lor lum contra las lengas regionalas. Un jorn, interdison l’ensenhament per immersion. Un autre explican qu’aquò val pel sol ensenhament public ; puèi, rectificacion l’endeman : non, pas d’immersion dins lo servici public, valent a dire : pas d’immersion tanpauc dins lo privat e l’associatiu. Un brave trabalh pels dos parlamentaris en mission qu’an per tòca de trapar lo biais d’autorizar çò qu’es defendut.

 Diacritic encara : Avètz lo dreit de sonar vòstra dròlla Loïsa, vist que la I trèma fa part dels signes diacritics reconeguts, mas vos es interdit d’apelar vòstre dròlle Loís, masculin de Loïsa que la I accent agut fa pas part de la famosa tièra ; seriá pas la marca d’una discriminacion entre dròllas e dròlles ?

 Militant ecologista : Lo Ronaldo vòl pas beure de Cxcx-cxlx e met de costat las cantinas dabans el a una conferéncia de premsa. Bona novèla : l’accion de la societat es en baissa. Lo jogaire portugués recomanda de beure d’aiga per venir un campion coma el, en plaça de venir gras coma un american a beure e manjar totes aqueles produits sucrats (Tot arriba dins aqueste monde capvirat : que digue, ieu, de ben de Ronaldo : vau anar verificar dins un miralh que soi… ieu !)

 Politica : Caldrà tornar prene los corses d’instruccion civica per explicar lo ròtle dels elegits locals, que nos an un pauc perdut entre comunas e comunautats, amb lo redescopatge dels cantons e de las regions ; amb lo doble discors presicant la decentralizacion e en gardant prerogativas centralisatriças ; amb la manca de mejans de las estructuras territorialas ; amb las competéncias compartidas que sabes pas totjorn a quna pòrta trucar… Votar, es cada còp important ; se desplaçar al burèu de vòte representa un brave acte simbolic e ciutadan. Apuèi, demòra a cadun e caduna de prene part a son biais a la vida collectiva, d’èsser actors (un pauc – plan - a la foliá) e pas s’acontentar de romegar per romegar.

 Desfaita : De fait, vos ai contat tot aquò per esvitar de vos dire lo malcòr de la desfaita de Carcassona-XIII en finala del campionat fàcia als vesins de Lesinhan. Bon, lo campionat tornarà prene a la tardor e poirem anar dins los estadis sens masquetas. E la ròda de la vida contunharà de virar.

Demascat Roch

Solucion de la rièja N°84

 

Cercatz lo Jaumet?

Anatz veire dau costat de la plageta...

 

Solucions de la rièja N°84

Lapaçon - Amagada -Sazrigas - EN (mossENh)  Dasi (sida) - Nin - Aranhas.

 Lasena - Amanir - Par. Na (natrium) Agid (diga) - Çaganh - Òdas - Nasics.

 

Los mai legits