dilluns, 27 de juliol de 2020

Sortida de residéncia

La guinhada de l'IEO d'Erau
sus RÀDIO LENGADÒC
(Picatz sus l'imatge, i tombaretz)
Una bilheta setmanièira, un agenda suls eveniments portats per los cercles d'Erau. (Quand n'i aurà...)
Diga ! Es lèu la fèsta de Sant Clar, lo temps de las cigalas, e quand poja lo mercuri, de costuma,  lo Felibritge de « febrilejar » dins de felibrejadas amb sos cortègis immudables, quand a la coa lanlèra e ribon-ribaina, fan treslusir sas cigalas d’aur o d’argent, ocasion d’airejar tanben las arnas de sos desguisaments naftalinizats e de sas dentèlas 1900. Los ancians son pas tristes, los joves tanpauc. Es tanben lo temps de las sortidas de residéncias e d’autras cigalas venon butar son sèga-sèga sus las plaças dels vilatges, presentar sas performàncias creativas dins de procèssuses avantgardistas que nos escapan plan sovent, en chucant quicòm mai que de saba de platana per s’encigalar.
 
Vòls que te diga ? Me sembla de los escotar, que de còps que i a, valdriá melhor los daissar embarrats dins sas residéncias aqueles artistas auto-proclamats e servar au fresc las tenèbras sornas de son engèni congreaire de trobar clus qu’es pas crestian de los daissar sus un empont,  a se faire venir la set en tarabastejant, quand plòu de brasas a ferratasses… Lo problèma es, dins aqueles ostalses de creacion qu’i van totes coma cabras a la sal, de se los veire radicalizar entre eles, un pauc coma a Guantánamo, o çò pièger, pichonar ensems.
De tot biais que siagam rais de l’estèla felibrenca, joglars ensolelhats que fan levar lo vent negre o simples colhons de la luna, coma tus e ieu, i tornarem lèu en residéncia susvelhada, per cas de recidiva dau virus. Aquí la nòstra astrada.
E, òu, dins l’espèra, passa a l’ombra !
Enfin, es çò que ne dise ieu.
La guinhada de l’IEO34. E, rau !

https://radiolengadoc.com/la-guinhada-de-lieo-derau/

diumenge, 26 de juliol de 2020

La rièja de Jaumet N°39


Bonjorn
De novèlas de la còsta. Aquela dimenjada es un pauc mai quieta encara que ...
Los rostits de la plaja son partits, esperam las aspirinas dins l'aiga. Se podiám crénher lo confinhament!

Mas per los valents i a totjorn la rièja de Jaumet

Orizontalas
1) Demòra boca dubèrta.
2) Montan.
3) Arriba a las vièlhas tinas.
4) Badines.
5) Netejat pel vent. Inicialas d'una principautat.
6) Medecina.

Verticalas
A) Se pòrta sul cap.
B) Caminaire.
C) Copar, dalhar lo blat lèu-lèu.
D) Dins una situacion quieta.
E) Fotras.
F) Balhar al revèrs. Nòta.
G) Plega, clina.

Negras
     E5, F4 

Solucion de la setmana passada:
 Bolejon - Olada - Siurièr - IV. Asti -Gaissat - Ast; Asa(gat)
 Bosiga - Olivas - Lau(rat). It... -Edras - Jaissa - Etas (Seta) - Narita

 E per brindar aqueste ser per que pas amb un Berló.

diumenge, 19 de juliol de 2020

La rièja estivala de Jaumet N°38


Bonjorn
E sèt oras manca un quart e  vesi de ma fenèstra de mond que son dejà a se banhar. Ièr de ser es a nòu oras un quart que lo darrièr sortiguèt de l'aiga, e per un còp i aguèt pas de banh de mièja nuòch. I a pas que nautres de patir de las òrdas nordicas, los peisses eles tanben an pas gaire de temps per èstre tranquils.

 Per las oras caudas de la tantossada una rièja estivala :

Orizontalas
1) Sarcia.
2) Legums per la sopa.
3) Arbre.
4) Quatre roman. Vin italian.
5) Rebrotat.
6) Necessari per un rostit o un mechoï. Arrosat amb un gat.

Verticalas
A) Ermàs.
B) Fruchas.
C) A mitat laurat.Entamena un itinerari.
D) S'arrapan als arbres.
E) Espofina sus la cara.
F) Vila mediterranèa en brofoniá.
G) Aeropòrt de Toquiò

Negras
     C4, D6, F2

Solucion de la darrièra rièja:
Gormina - Arieges - Rieja - Rejas - Iran. Ra -  Cassant
Garric - Oriera - Riejas - Mejans - Igas - Ne(on) uRNa - Astrat

Un conselh d'amic: Un Faugièras ajuda plan per trobar las solucions.

Lo maridatge per UN

La guinhada de l'IEO d'Erau
sus RÀDIO LENGADÒC
(Picatz sus l'imatge, i tombaretz)
Una bilheta setmanièira, un agenda suls eveniments portats per los cercles d'Erau. (Quand n'i aurà...)

https://radiolengadoc.com/la-guinhada-de-lieo-derau/
 
Diga ! Ère convidat a un maridatge estivenc e me fasiá gaug. Aviái aprestada ma camiseta Macarèl la mai crana, netejada la berreta de las tacaduras de sulfata e, polit coma un ametlièr florit de genièr, ère sus los carbons. Mas puta de virus, adieu regalèmus ! Lo Tamaron de Vendargue deurà esperar lo Total Festum de 2021 per menar a l’autar una Baragònha que, pauròta, a 1 mètre de son aimat, es pas prèsta d’anar au contentièr.

Vòls que te diga ? Aquò seriá pas arribat se Baragònha e Tamaron avián seguit la darrièira mòda de la sologamia o maridatge d’una persona amb ela meteissa. « Baragònha es que te vòls prene tu meteissa per esposa ? » - E ben-òc, vòle ben.  « Alara, passa-te l’anèl e fasèm fèsta ! ».
Ieu, i vese pas que d’avantages a la sologamia, cau dire que siái per la patz dins los parelhs e qu’un parelh de un aquò es de solide, duradís fins que la mòrt lo dessepare pas. Per te demandar ta man, basta d’anar veire tranquillet tos parents que normalament seràn puslèu contents de te veire prene quauqu’un de tan bona familha : meteis nivèl social, meteissa fortuna, color de pèl, cultura, religion… E puòi aquò es provat, au dintre dau fogau, la sologamia demesís las riscas de garrolhas, simplifica la reparticion dels trabalhs de l’ostau, la causida de las sortidas o dau programa tele. E se jamai resquilhas dins lo valat adulterin, au pièg anar, es tot lo parelh que fauta en s’auto-embanant.
 En mai, s’aquò se sap e mena l’union au fracatge e au divòrci, ges de besonh de se batre per la garda dau cat…
Enfin, es çò que ne dise ieu.

La guinhada de l’IEO34. E, rau !

Los mai legits