Exposicion dau 28 d'agost au 12 de setembre a Seta
Emmascats - Fétiches, masques et totems
Segur, l'inspiracion es subretot africana e oceaniana, mas los masc(a)s, diables, òmes sauvatges
e bèstias miticas sont internacionals !
En mai, n'i a un fais que son faches de lenha flotejada trobada per las plajas d'aqui...
LEGISSÈTZ OCCITAN…
Profitatz de vòstre temps de vacanças per legir en occitan. L’Institut d’Estudis Occiatns perseguís son òbra bèla d’editor e ven de publicar una novèla plega d’A Tots (cada an, la sortida de 4 libres novèls). Dins la tièra d’ongan, traparetz 4 obratges diferents per noirir vòstra set de lectura :
• Coma un cadavre al riu getat, un roman policièr de Jòrdi Peladan : Es en Cevènas, a l’entorn del pargue nacional que la sobrepolida e petejanta detectiva Margarida Cercamond e son luoctenent menan l’enquista. Lor caldrà furgar al mitan d’una comunautat de Ipís, de borruts coma se dison dins lo país, d’un « neò-cevenòl » que viu en salvatge dins lo mas de familha, d’un ancian rasetaire vengut alcolic e borrèl d’ostal, d’un amic caçaire de singlars e de plan d’autres. Rescontraràn dins son barrutlatge la regenta del vilatge apassionada de botanica, una anciana actritz de cinemà X venguda cabrièira, e comptaràn suls collègas policièrs : tot aquel monde dins un decòr espectaclós de valats, de sèrres e de castanhièrs.
• Disparicions, un recuèlh de novèlas de Joan-Claudi Sèrras : Coma dins Masquetas e Mariòtas, sèm sus la rara entre vida vidanta e subrenatural, dins un univèrs ont tot, a cada segonda, pòt caplevar e desaparéisser per l’efièch d’una volontat clara o escura, mas tanben sens cap de rason… « Atràs, sola, ramponada a la ridèla, la nòvia, ela, disiá pas res jol vel. Tot lo sang se li èra trait de la cara. Tremolava de contunh, e degun se’n mainava pas. Vertat ça que la que fasiá mens freg ; un aire docet se levava. Fariá plaser de véser fondre aquela nèu. Catarina agachava la pagina esbleugissenta e voida del mond, que puntuavan sols los accents circonflèxes dels gòrbs. » (in Maridatge blanc)
• A l’ombra dels cerièisses bèles, un primièr roman de Bernadeta Romieu : La cerièreda de la bòria de las Fontanèlas, una istòria de familha, una longa istòria, contada un jorn de prima a Flavian per son grand, Benedit. Un raconte per fisar lo lagui que lo rosega : Rosan, son filhòl, s’ensalvèt un jorn aprèp una disputa. Las novèlas se faguèron de mai en mai escarsas e un jorn pas pus res ! Flavian serà encargat de lo retrobar. Mas cossí apariar son mestièr de reportaire de guèrra e aquela cèrca incertana ? L’escomesa es granda mas una promessa es una promessa…
• Amontanhatge, un roman novèl de Miquèu Arnaud, sos-titolat : Lei tres libres. Al sègle XV, en Provença, tres vidas entrecrosadas de tres jovents que venon de quitar l’enfança : Amielh que deviá èstre lauraire, serà pastre ; Bertrand que veguèt lo jorn entre mastra e forn, aurà pas de farina dins las mans, mas l’espasa ; Clamenç, enfantonet nascut dins un vilatjon, passarà sa vida dins las clastras d’una abadiá. Promeses a una existéncia quieta, se trobaràn implicats dins los torments de l’Istòria.
• Per comandar : https://ideco-dif.
Pergamin Roch
