Lo papieròt de l'Alan Roch
Lo fuelheton de las masquetas se perseguís amb l’autorizacion de l’enlevar defòra, levat se siás dins un estadi, e de la gardar dins los magasins. Bon, probable que las règlas cambiaràn deman o deman passat. Pel moment, nos acontentarem de tornar descobrir que lo monde an tanben bocas per parlar, beure, manjar, potonar, mossegar ; e que lo nas servís per respirar. Una brava leiçon d’anatomia que n’aviam bravament perduda l’idèa. Çaquelà, demòra malaisit de faire la tria entre los mascats, los demascats e autres emmascats que d’unes s’amagan jos masquetas virtualas, falsas o, quitament, realas.
• Emmascats de primièra : Los membres del Conselh constitucional que sabon pas tròp cossi penjar lor lum contra las lengas regionalas. Un jorn, interdison l’ensenhament per immersion. Un autre explican qu’aquò val pel sol ensenhament public ; puèi, rectificacion l’endeman : non, pas d’immersion dins lo servici public, valent a dire : pas d’immersion tanpauc dins lo privat e l’associatiu. Un brave trabalh pels dos parlamentaris en mission qu’an per tòca de trapar lo biais d’autorizar çò qu’es defendut.
• Diacritic encara : Avètz lo dreit de sonar vòstra dròlla Loïsa, vist que la I trèma fa part dels signes diacritics reconeguts, mas vos es interdit d’apelar vòstre dròlle Loís, masculin de Loïsa que la I accent agut fa pas part de la famosa tièra ; seriá pas la marca d’una discriminacion entre dròllas e dròlles ?
• Militant ecologista : Lo Ronaldo vòl pas beure de Cxcx-cxlx e met de costat las cantinas dabans el a una conferéncia de premsa. Bona novèla : l’accion de la societat es en baissa. Lo jogaire portugués recomanda de beure d’aiga per venir un campion coma el, en plaça de venir gras coma un american a beure e manjar totes aqueles produits sucrats (Tot arriba dins aqueste monde capvirat : que digue, ieu, de ben de Ronaldo : vau anar verificar dins un miralh que soi… ieu !)
• Politica : Caldrà tornar prene los corses d’instruccion civica per explicar lo ròtle dels elegits locals, que nos an un pauc perdut entre comunas e comunautats, amb lo redescopatge dels cantons e de las regions ; amb lo doble discors presicant la decentralizacion e en gardant prerogativas centralisatriças ; amb la manca de mejans de las estructuras territorialas ; amb las competéncias compartidas que sabes pas totjorn a quna pòrta trucar… Votar, es cada còp important ; se desplaçar al burèu de vòte representa un brave acte simbolic e ciutadan. Apuèi, demòra a cadun e caduna de prene part a son biais a la vida collectiva, d’èsser actors (un pauc – plan - a la foliá) e pas s’acontentar de romegar per romegar.
• Desfaita : De fait, vos ai contat tot aquò per esvitar de vos dire lo malcòr de la desfaita de Carcassona-XIII en finala del campionat fàcia als vesins de Lesinhan. Bon, lo campionat tornarà prene a la tardor e poirem anar dins los estadis sens masquetas. E la ròda de la vida contunharà de virar.
Demascat Roch
Cap comentari:
Publica un comentari a l'entrada