"Amen, amen, sèm pro per manjar çò qu'avèm,
Mas pas per cantar !
Se quauqu'un mai vòl venir,
Almens que se cope pas la camba en camin ! »
Los cants platanics...
Quand a la crosada de nòstras cèrcas artisticas o puslèu mai segurament de nòstres caminaments d'abramats de lenga d'òc,
dins lo rescontre dau giscle de la fòrça brutala de las voses e de l'espetament gaujós dau cant popular occitan,
dins lo plaser renovelat de la galejada sautaròca e l'afrairament,
mas tanben dins la calama,
quand s'apasima la brofoniá e que cantorleja l'oscillacion de l'amna enlairada sus las alas de l'autbòi felipadocian,
plan luònh de
l'escura lirica o de la frasa de rap raspada et afrosament americanizada
dau disc de vinil que zin-zoneja a la revèrs en caïnejant son planhum
mortejat,
quand los mots,
pastats per de generacions e de generacions de davancièrs,
son molinetejats per de còrdas vocalas primitivas non jamai adomergidas,
sauvatjas,
e que, descabestrats venon, dins un bufal espectaclós, prene son vam vital,
expulsats de grandas maissas, negrassas, coma un coloriatge de Soulatge pichotet,
quand lo vesin dau dessús, revolumant de longa dins son lièch coma una baudufa agent trapat lo moviment perpetual, barrarà pas l'uòlh de la nòch...
...resclantís al pus fons de las garrigas nautas, dins lo prigond de la gòrjas d'Erau, la clamadissa de la
Corala de Sant-Guilhem
Primièrs clams lo 9 d'octòbre, sala Govèrna, 20H45
coma cada an, a quauques jorns de la Sant-Just, (lo sant patron de la corala)
Novelairas e novelaires benvenguts e mai los pairòls traucats!
Repertòri tradicional occitan, cants
polifonics personalizats (aquò vòl dire que cadun canta a son biais)
acompanhats per lo subre-bèl Mèstre Albareda -Carcassés!
S'apargar dins los en-basses e montar
d'a pè la carrièira principala dau vilatge, a la crosada prene a
l'esquèrra, la sala es a trenta mètres a gaucha.
Entresenhas per mèl cercle.occitan.max.roqueta@
