PAPIERÒT MENERBÉS (in La Semaine du Minervois, 18/02/21)

 COSSÍ NASQUÈT LA BODEGA ?

La bodega/la craba es l’instrument emblematic de la Montanha negra. Se pensèt qu’aviá desaparegut dins lo grand debrembièr de l’istòria e de las culturas popularas. Mas, entre collectatges, recèrcas e prestacions musicalas, l’instrument tornèt prene vam e reconquistèt una plaça bèla pels passa-carrièras o sus los emponts. Amb, per exemple, l’espelida d’una escòla de bodega a Vilardonèl (Aude), ont visquèt un musicaire e collectaire plan important dins son reviscòl, lo Charles Alexandre ...

Sòfia Jacques es una actritz importanta e portaira d’aqueste reviscòl : a permés e obtengut la dobertura d’un cors al Conservatòri de Carcassona. Obrèt a la realizacion del film Bodega, buf de vida e d’un CD-doble Bodega en viatge per faire descobrir l’instrument. Ven de crear la formacion Bodegam bal per animar concèrts e balètis. La bodega se marida tanben amb l’aubòi dins la formacion Mar e Montanha .

En aquesta fin de 2020, ven de publicar un libròt dins la colleccion pels joves legeires Farfadet de l’IEO-Aude : La Crab’Estela per contar l’origina legendària de l’instrument. Lo tèxte s’apièja sus l’espectacle atal titolat que presentèt fa quauquas annadas pel jove public.

Alara, cossí nasquèt la bodega ? L’autora revèla, pels pichons e pels grands, cossí aquò se passèt (de vertat, de segur) un còp èra… Dins aquela naissença, una fada-mitona joguèt un ròtle de primièra. Mas cossí una craba se transformèt en un instrument de musica, qun ròtle joguèron dins l’istòria aquela encantada, lo pichon Tiston e tanben l’ors Pèdescauç ?

Lo libre de 16 paginas es polidament illustrat de 4 dessenhs plena pagina per Pascala Théron (bodegaira, ela tanben). Podètz de mai escotar l’istòria dita per l’autora e l’Isabèla François, amb d’illustracions musicalas, dins un enregistrament d’Ives St-Germain, siá en podcast mercé a RCF-Pays d’Aude e sa cronica occitana Als 4 Vents, siá en vos procurant lo CD de l’enregistrament.

En abans-tast, vaquí la debuta d’aquela istòria plan misteriosa : « La bodega es nascuda d'una craba.  « Cossí ! me diretz, nascuda d'una craba ? » E òc, e aquò se passèt pas dasièr nimai ièr passat. Vaquí cossí se passèt i a plan plan temps. Un còp èra, i aviá una Fada Mitona. Sabètz, las fadas, coma las sansònhas, an una familha de las bèlas, n'i an de tota mena : i a la fadarèla, la fadeta, la masca, la fachilièra, la bruèissa, l'encantada, tot un fum ... aquela d'aquí èra una fada mitona. Son elas las mitonas que se mainan de las aigas e de las fonts, mas aquela d'aquí èra tanben fòrça amiga amb los vents. (…) La fada Mitona aculhiguèt un drollet perdut. Lo sonèt Tiston e l’aimèt coma son filh. Tiston s’arregalava de gardar las crabas amb son amic Pèdescauç qu’èra un ors. » E la fada Mitona aviá avertit l’ors : « Te cal pas tocar las crabas del tropèl ! ». Mas los orses son lipets…

• Lo libre : 5 € (+ 2 € de mandadís) ; lo libre e lo CD : 8 € (+ 2 € de mandadís). De comandar a : IEO-Aude BP 51042 11860-Carcassona Cedex