Palhassas !

  La guinhada de l'IEO 34 ! 

sus RÀDIO LENGADÒC. (Picatz sus l'imatge, i tombaretz)

Diga ! I a de comunas que s’i entendon mai que d’autras per far de « ligam social » per los pinzutus, los ponchuts. Antau, fa d’annadas que dins los vilatges brancats, per Calendas, vesèm arribar en elicoptèr  lo Paire Nadau per agranar de saucissa electorala sa clocada d’elegeires en devenir ! Mas, uòi, vòle tirar lo capèl, lo tambre de las plumas d’auca, a los de Cornonterrau. Per Carnaval, aguèron l’idèa subrebèla de faire montar en l’èr -e sens escaleta- lo prefècte de Montpelhièr e d’organizar dins lo plen de febrièr un defilat digne dau 14 de julhet de tot çò que lo departament compta coma polícia e gendarmalha. E òc, los palhassas de las masquetas de rabàs faguèron tremblar aqueste an la republica de França, los blancs èran blaus e lo roge vinassièr… E siaguèt a de bon la fèsta nacionala.

 

Vòls que te diga ? A Cornon, l’autre ièr, tot coma a la Martinica lo dimars gras, se donava Mòrt e resurreccion de Monsur Carnaval, dins son èime prigond. Pensatz que los que prenguèron la Bastilha en 1789 avián la benediccion dau rei Cezet o que los comandos de la nuèit cars au pòble de las vinhas tenián en pòcha una derogacion dau Debré per escampar a la gandòla de vin d’importacion ? Volètz manifestar uòi amb las autorizacions administrativas, caminaretz sus los ralhs dau tram dins de desèrts d’immòbles per destorbar pas l’òdre republican. Quicòm que me còrcacha pasmens, es que l’agèsson pas fotut dins la semau de raca aquel prefècte aparisenquit… abans que de li pagar lo còp de cartagèna.

Enfin, es çò que ne dise ieu…

 

La guinhada de l’IEO34. E, rau !