PATIN-PATAN, PAS RES !
Nos encombram lo cap de causas sens cap d’interés, que siaguen de pauc de valor o que representen una importància maja. Un montairon de « res del tot », plan sarrats los uns contra los autres, plan pinhats (sens cap de distanciacion sociala) que venon, unes còps, preocupacions de primièra. Ne vaquí una pichona tièra sens cap ni centena :
- Paure caçolet : Una marca que se recomanda d’una existéncia mai que centenària (e installada dins un departament occitan) fa publicitat a la television pel caçolet de Castèlnau d’Ari (enfins, sa preparacion en boita). Unes imatges te mòstran unas salsissas roginèlas qu’an un aire de Tolosa (o de Lauragués) gaire prononciat. Mas aquò es res rapòrt a la presentacion del plat : un plat rectangular tot negre (genre : en fonda) ! Un caçolet dins una caçòla èra pas possible de lo filmar atal ? A l’agéncia de publicitat, i an pas pensat ?
- De qué manjam aqueste ser ? : Autra publicitat per un supermercat que te prepausa l’aplicacion que te va dire çò que vas crompar, comandar e te faire menar lo tot per la Coleta de la clica ! Pas mai de besonh de s’anar passejar pel magasin, de tombar sus un produit imprevist, d’aver una idèia que grelha dins ton cap, de dire dos mots a la caissièra (bon, ai constatat que las caissas automaticas mancan de dialògue),… Inutile d’anar faire una virada sul mercat local… Qun monde de la solesa e de consomacion se prepara, nos preparan e nos preparam. Las aplicacions, aquò vòl dire qu’avèm pas mai a nos aplicar per res !
- Calfatge economic : Compreni pas lo monde que se planhisson del còst del calfatge. Vesètz que per un euro (simbolic), l’Estat se pòt pagar unes grases de rescalfament climatic (non solament per França, mas tanben per Euròpa e la planeta). Compreni pas que las associacions ecologistas se regaudissen d’aquesta decision de justícia. O son dins una tala misèria que veson aquel euro coma la promessa d’una fortuna a venir, qu’aurián faita atal l’afar del sègle ?
- Jornada sens telefòne : Dins l’encastre de las jornadas jornalièras que ne faguèrem la tièra (incomplèta) dins unas cronicas passadas, se trapa una jornada sens telefòne programada lo jorn de la Sant Gaston. Cossí se passa quand lo Gaston ausís lo tindarèl telefonic seun aquel jorn e qu’a enveja d’i respondre se per cas li soetavan la fèsta ?
- An tot inventat : L’USAP met dins las tribunas de son estadi d’Aimat-Giral de representacions en carton dels espectators que pòdon pas s’i venir setar. Fièrs coma tot, proclaman que son lo primièr estadi de rugbí del monde a prene l’iniciativa. Es vertat qu’un bon quinzista catalan gaita pas las partidas de XIII del campionat australian de la NRL : fa un an qu’aquò se practica de l’autre costat de la planeta (enfins, se practicava vist que lo public es aval de retorn dins los estadis). Mas, a unes catalans, lor i escalfa lo cap de se creire lo centre del monde !
Patanet Roch
Cap comentari:
Publica un comentari a l'entrada