La guinhada de l'IEO 34 !
sus RÀDIO LENGADÒC, d'escotar sens cap de moderacion. (Picatz sus l'imatge, i tombaretz)
Diga ! La vinha jalèt l’autra nuòch, plora lo vinhairon coma ploravan los gavèls lo mes passat e dels borres rostits tirarem pas lo vin que regaudís lo còr de l’òme.
Avèm ja vendemiat, sèm confinhats mai ad vita æternam, morisson lo monde dins los espitaus e la marrana s’espandís…
Pasmens, se crentave pas de ficar un pauc mai lo pati, vos diriái d’èsser po-si-tius ! Qu’avèm de rasons de las bonas de veire uòi las causas dau bon biais : la lei Mollac ven de passar -los deputats faguèron escòrna au govèrn de París- e un bonaür venent pas jamai solet, nos anoncian lo meteis jorn la barradura a de bon de l’ENA : l’Escòla Nacionala dels Ases.
Bon, cau relativizar que bastiràn lèu una autra escudariá per totes aqueles ases que son pas totes de Ginhac o de catalàs burros ! Mas, e s’aquò es pas positiu me mange lo capèl, la lei novèla deuriá permetre, se non m’engane, de faire de l’ensenhament immersiu en lengas dichas regionalas dins aquela escòla novèla que formarà deman totes los nauts fonccionaris de l’Estat.
Vòls que te diga ? Es aquí la solucion de l’embolh : una escolassa per l’eleit dau país, que, en fonccion de son origina asina o de son afectacion futura seriá escolarizada en còrse, alsacian o basc o dins una seccion de tipe calandreta, diwan, breçòla… Bastarà puòi de los metre en pòste dins l’endrech que ne mestrejaràn la lenga e la cultura - lo bon pòble que sèm los entendrà melhor se parlan coma nautres- e se jamai vòlon mudar los catons endacòm mai, lor tornarem far préner lo camin de l’estudi a còp de pè plan plaçat, s’o cau, dins l’encastre de son compte de formacion professionala.
Passère pas per l’ENA, vos l’acòrde que siái pas mai qu’un Innocent de Niana, mas enfin es çò que ne dise ieu !
La guinhada de l’IEO34. E, rau !
Cap comentari:
Publica un comentari a l'entrada