d'escotar sus RÀDIO LENGADÒC. (Picatz sus l'imatge, i tombaretz)
Diga ! Ò bon pòble de França, se trufan de tus ! T’an tornar fach lo còp de la poma de tèrra… Vos sovenètz benlèu pas qu’a la debuta, au sègle XVIII, digús ne voliá pas manjar de las patanas, bonas per los pòrcs, pas mai ! E, lo Parmentièr t’aguèt l’idèa terribla de far gardar sas trufièiras lo jorn per la soldatalha, de biais de n’encoratjar lo raubatòri la nuòch.
Per los vaccins faguèron çò mèmes ! Se los angleses en perfièches gentlemen i anèron solet, se los Alemands, coma un sol òme, seguiguèron las consignas, per los franceses -totes anti-vaccins levat Mauriceta- calguèt jogar mai fin. Çò que faguèron : « I avètz pas drech, sonque los vièlhs… » -Ne volèm ! « N’avèm pas pro. » - Ne volèm. Per totes !
E siaguèt blat ensacat, i corriguèron totes coma cabras a la sal. Los tipes serián pas capables de se trapar una plaça a las galèras mas son de vertadièrs especialistas en infecciologia, laboratòris, principi actiu -ARN o pas- eficacitat contra los variants avariats… E vòlon aquela potinga e subretot pas aquela. Ieu espèri lo Johnson, a ieu me cau Modernà que siái totjorn estat un progressista a la poncha de la modernitat…
Vòls que te diga ? E los efièches segondaris ? Se’n parlèt un temps, puòi… Rai d’un grumèl dins lo cervèl en luòc d’un céser dins la clòsca !
Me daissère dire que Pfizer es tanben l’inventor dau Viagrà e aquí i a pas digús que repoteguèt contra las consequéncias indesirablas. Tè, i anère per espinchar, au vaccinodròme de Vailhauqués, a cò dels pompiers. I a un viralum que se vei de luònh, un viralum roge e de mond aquí dedins, a la coa lanlèra, una coeta longassa, que s’estira…
Mas, rigorosament ma maire me defendèt de ne dire mai aquí.
Me’n tornère doncas butar mos patanons. Enfin es çò que faguère ieu !
La guinhada de l’IEO34. E, rau !
Cap comentari:
Publica un comentari a l'entrada