PAPIERÒT MENERBÉS (in La Semaine du Minervois, 16/09/21)

 LISTA COMPLEMENTÀRIA

Aqueste còp, perlongarai las tièras d’informacions : d’una part, sus la programacion
cinematografica occitana ; d’autra part, sus la literatura francesa.

- Escran blanc : Lèu, se poirà enfins véser dins lor version occitana los films : Qun-Con ; Los revoltats del Pontilh ; Lo pont del riu cai ; Los nauts de Bramavent ; Lo falquet maltés ; Lo Ciutadan de la Tirona ; Per qual tinda lo clas ; Lo Tresaur de la Sèrra Maire ; Baloard del calabrun ; La mòrt me perseguís ; D’unes l’aiman plan caud ; La ràbia de viure ; L’Istòria del costat de Ponent ; La bona e la cleda ; Trufas sus canapè ; La clau del pastre ; Lo doctor de l’Amor fòl ; Istòria d’Amor ; La Planeta de las moninas ; Lo nenon de la Ròsa-Maria ; Lo vaquièr sul quitran ; Los caissals de la mar ; Vòl ensús d’un nis de cocut ; Lo menaire de taxi ; Ramba-te ; La dança del laucet ; Rauba un còp ; Alaric Pargue ; L’Arma jol gueridon ; L’Òme de la pluèja ; La Nòvia èra en negre ; La femna d’a costat ; Que vengue dimenge !

- Sul papièr : Dison que l’Eugenia Grandet se maridèt amb Joan-Petit (que dança, que dança…). Joan-Paul Sartre escriviá totjorn pòrtas barradas. Rastinhac se balhava vam a còps de veirons d’Armanhac. L’absorcion de cidre ajudava lo Cid dins lo manejament de l’espasa. Se pòt dire que l’Arpagon aviá las arpas longas. Lo Rubempré se vesiá venir de luènh. Zadig : un còp èra dins la ziga e l’autre dins la zaga. Lo Modianò passa pas de mòda. Lo Robbe-Grillet : a embarrar dins una gàbia amb una fuèlha d’ensalada. Òm se mesfisa jamai pro d’un Gary. Patric Cauvin bèu de vin caud. Cendrars mancava pas de jogar d’aubòi per la sant Blasi. Bernat Clavèl ne sap pas plantar un sol. L’Esfinx es pas capable de respondre a las questions de Daidièr Daeninckx. Decoin jòga als tres cantons. Arriba al Max Gallo d’èsser missant coma la gala. Fajardie se perdèt dins los bòsques de La Faja. Comptetz pas sus la Regina Desforges per tustar sus l’enclutge. Edoard Glissant es un mèstre del patinatge artistic. Patric Grainville s’es pas avisat que los grans venián al campèstre. Lo Josèp Joffò joguèt a las bilhas tota sa vida. Houellebecq : ont es lo bèc es pas la coga. Milan Kundera, de qué trapèt dins lo Kinder-suspresa ? Lo Clézio es pas la mitat d’un piòt. Alexandre Jardin vos portarà pas d’ortalalha. Amin Maalouf s’asseta sus un pof. Pèire Manhan alinhava mots coma manhans dins una manhanariá. Bernard Noël escriu quand fa bèl. Gerard Mordillat sap mossegar sos personatges. Daissatz dormir Joan d’Ormesson. Franc Pavlòff presa los matins clars. Roman Puertolàs trabalha coma caissièr cò d’Ikea. Sèrgi Quadruppani escriu amb las mans e amb los pès. Los poèmas de Pèire Reverdy verdejan a la prima tornada. Felip Sollers se desplaça en rollers. Robèrt Sabatièr cercava sabatas a sos pès. Tant val Gerard de Villiers coma Felip de Villiers. Miquèl Zink escriu apiejat al zinc.  

Ajust Roch