Cronica Al Solelh d’Òc (Le Petit Journal de l’Aude, 16/12/21)
Coma cada an, es vengut lo temps d’escriure a l’Òme-Nadal e de se demandar cossí se rumarà pas los vestits en davalant per la chiminièra que lo menarà se rescaufar las ancas sul brutlaire de la caudièra ; li cal protegir sa barbassa blanca, sustot s’es de coton o d’una matèria indefinida.
El, encara, se pòt faire magre – filifòrme, pensi pas —, mas lo gòrb cossí lo faire seguir sustot s’es encara emplenat de presents coma l’èra de carinhana o de granacha lo del gorbejaire dels temps ont òmes e femnas festejavan setembre en caminant per las tièras de vinha per vendémiar !
Alara, de qué li dire al Grand Barbut ? Benlèu aquò :
« Car Òme-Nadal (e per èsser car ongan es car, que lo prètz de las joguinas a bravament pujat, que las boitas son perdudas en mar sus de batèus bèls qu’avançan a recuolons entre China e Euròpa !), per aquesta polida fèsta ivernenca, aimariái plan :
- te dire que Nadal es pas Carnaval e que desiram faire un grand fuòc (sens esperar Sant-Joan) per i getar totas aquelas masquetas de teissuts transformadas en para-virus per se poder tornarmai cargar las masquetas del Carnaval vertadièr : tu, Pierròt, ieu : godilh !
- te suplicam de trapar un chut de primièra pels portaires de discorses que fan rajar l’òdi dels autres, dels vesins e de se.
- te pregam de balhar un temps bèl de television a las partidas de XIII que se ba meritan plan,
- convida-nos ton confraire ivernenc, l’Òme-Nèu, per que l’ivèrn semblèsse a l’ivèrn, que nos portèsse (per un còp) un pauc de refregiment climatic e que poguèssem seguir la farandòla dels borrilhs plan al caud al pè del fuòc. »
E puèi, agèm una pensada esmoguda pels enfants de la Val Nauta d’Aude (del costat de Renas) que benlèu auràn pas de presents se ne cresèm la pichona faula seguenta : « Dins la freda nuèit nadalenca, / Lo rèn renava : / Anar als Banhs de Renas / o al Castèl de Renas ? / De matin, / Los dròlles de Renas, / Los dels Banhs / E los del Castèl, / Totes renèron : / L’Òme-Nadal èra pas passat ! ».
Nadal Avet
Cap comentari:
Publica un comentari a l'entrada