La guinhada de l'IEO d'Erau, sus ràdio Lengadòc
Diga ! Quand au moment dau confinhament metère en linha mos corses d’occitan, me trachère qu’una part non negligibla de mos escolans aviá pres la virada de l’internet ...per lo morre. N’i aguèt una que me mandèt sos devers per la Pòsta amb una envolopa sagelada per la responsa, un parelh lo cap en bas per la visio setmanièira, una granda maissa que demorèt sens lo son pendent 3 setmanas que trapava pas lo micro, etc… Fòrça m’èra de constatar qu’aviái afar a un tropèl d’EDIs, d’Endecats De l’Informatica que faguèron mai de progrèsses dins lo manejament d’un ordinator qu’en lenga nòstra. Rai, aquò o tendrem totjorn !
E pasmens l’internet es un bon ase que carreja tot, absoludament tot çò qu’òm li carga sus l’esquina e que vos permet de partejar vòstra vida excepcionala amb lo paure mond qu’an pas una astrada tan polida coma la vòstra. Pr’exemple, vos pren una pichòta set - aquò arriba- e davalatz a la cava per tombar un parelh de botelhas d’aramon, e ben, podètz anar sus Twitter e bresilhar au mond tot : « siái a m’onchar lo gargalhòl ». Faretz puòi una fòto de las cantinas voidas que postaretz sus Instagram per faire biscar vòstres seguidors. Tanlèu caudrà far petar vòstra performància de chucafiòla e metre a jorn vòstre retrach professional sus LinkedIn, òm sap pas jamai : « Tastavin de primièira division cèrca trabalhòt pagat en rapòrt de sas competéncias ». E quand los uòlhs vos faràn bavarilhas caudrà pensar a filmar las beluguetas que dançan dins la polsa de la cava e las metre en linha sus Pinterest. Puòi anaretz sus lo facebook per testimoniar qu’efectivament la tèrra es plata, mas qu’es pas anivelada coma cau que cada còp que vos servissètz un veire ne fotètz d’en pertot…
Volètz que vos diga ? En mai, dempuòi que lo peis d’abriu a passat, tot çò que i a sus internet es vertat vertadièra. Alara qué de mai ?
Enfin es çò que ne dise, ieu...
La guinhada de l’IEO34. E, rau !
Cap comentari:
Publica un comentari a l'entrada