Lo Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Los cavalièrs ? la fèsta de Sant-Afrodisi primièr evesque de Besièrs ?
Tot aquò se trapa fin d'abril e debuta de mai. Lo primièr cavalièr, Jorget lo 23 d'abril e la fèsta de Sant Afrodisi lo 28 d'abril. (los autres cavalièrs: Marquet lo 25, Tropet lo 30, Croset lo 3 de mai e Janet lo 6 de mai)
Mas coneissètz la legenda de Sant Afrodisi?
Sant Afrodisi venguèt d'Egipte amb son camèl per evangelizar Gàllia e lo faguèt fòrt plan . Lo governador roman lo condamnèt a mòrt. Decapitat, amassèt sa tèsta e tornèt per morir dins la cauna que i viviá. Una familha de terralhièrs reculhiguèt lo Camèl e li provesiguèt manjar e dormir, puèi la communa de Besièrs decidiguèt de prene a sa carga l'entreten del Camèl. Un fèu destinat a l'entreten del Camèl foguèt creat e destinat a la caritat publica per finançar la fabricacion de pans donats als paures aprèp èsser estats benesits per l'evesque de Besièrs.
E a l'ora d'ara ?
Per perpetuar lo sovenir del Camèl, un Camèl de fusta foguèt bastit e desfila per las carrièras de Besièrs per las celebracions de la Sant Afrodisi lo 28 d'abril e per las fèstas de las Caritats, lo jorn de l'Ascension.
Lo Camèl es una enòrma maquina que bolega mercé quatre personas abrigadas dins sos flancs. Sus sas cobèrtas d'inscripcions : « Ex antiquitate renascor » es a dire « respelissi de l'Antiquitat » e l'inscripcion lengadociana « Sen fosso » es a dire « Sèm nombroses, sèm fòrces »...
Per la Sant-Afrodisi, se trapa mercadièrs de terralhas, de « gisclets » per los dròlles, sens doblidar las « còcas » ! Un pastisson de primièra ! E a l'ora d'ara, un concors ven recompensar l'artesan qu'a fait la melhora còca !
(Mercé plan al CIRDOC per las informacions)
Zo ! Al còp que ven e portatz vos plan !
Se pòt escotar « Lo Mescladis » de Bobí sus Ràdio Lengadòc en picant sus l'image o sus lo site de Ràdio Lodeva.
Cap comentari:
Publica un comentari a l'entrada