Diga ! « Aquò son pas que musicas de sauvatges ! ». Quant de còp m’o diguèron pas quand -jovent a la debuta de las annadas 80- cabussave dins lo còr de ma nuòch d’ado. a l’escota d’un grop de rock[1] que pantaissave el tanben d’un autre monde. E puòi descobriguère la ja anciana nòva cançon occitana e ara per ara, berreta o jupa escocesa, autbòis e bodega - amplificats vos prègue, coma se mancava pas qu’aquò !- per far montar l’alhòli de l’incompreneson amb d’enfants que se cargan lo casco tre que vòle escotar quicòm a l’ostau. Rai. Antau se pagèla tradicionalament dins la familha lo valat generacional. Diga-me çò qu’escotas, te dirai onte te quihas sus l’aubre genealogic…
Volètz que vos diga ? A primièira vista semblariá que siaguèsse un pauc çò mèmes, aquí, per lo país dels Sautaròcs[2]. Mas s’i cau pas fisar…
Regularament, per lo campèstre, avèm l’astre -òc-ben l’astre- d’èsser costumièrs de las raves clandestinas (de l’occitan « rèva » segon Cantalausa[3]) que se debanan dins lo rèire-país clapassièr. Coma dau vilatge s’ausisson pas que las bassas, un rotlament de tamborn discontinú segon coma bufa lo vent, quand fas ta plaça l’endeman de matin, lo mond te dison : « Tè, i aviá los indians dins lo prat aval, au gorg de Joan Serrana ». D’indians finaudèls que vesèm passar a la coa lanlèra coma cròtas au cuol d’una bica -son sovent negrevestits- a boca de nuòch sus lo dralhòu de la fèsta. D’efièch, per se faire agantar pas per la polícia, davalan d’a pè au gorg, per de sendas escalabrosas, quand la polalha los espèra -espèra qu’esperaràs !- dau costat dau camin enquitranat. Tant que son bandats o jos potingas an pas la nhaca per tornar montar e préner la veitura. Plan. Puòi, sauta los ròcs e rotla ! Lo son d’a fons dels nautparlaires gigants ressontís dins la comba e fa fugir los singlars dau costat de Niana, luònh, plan luònh de nòstras vinhas. Fòrça plan.
E, aicí sèm, totes contents, la musica fa lo ligam intergeneracional.
Enfin, per çò que ne dise, ieu.
La guinhada de l’IEO34. E, rau ! Una guinhada pareguda dins lo Diari.
Lo Diari, de legir ara !
|
|
|
La version papièr del Diari n°67 es arribada en çò dels abonats e abonadas. Mas podètz tanben causir de legir la version numerica del magazine en picant sus l'image puèi en vos connectant. |
[1] Lo grop Téléphone
[2] Escaisnom collectiu dels estatjants de Sant Guilhem
[3] Rèva = fantasiá, absurditat. Amassada festiva secreta de musica e de dança tecnò. Sens modèrn que nos torna per l’anglés. Cantalausa, Diccionari general, Edicions cultura d’Òc, 2003.
Cap comentari:
Publica un comentari a l'entrada