L' IEO 34, seccion departamentala d'Erau de l'Institut d'Estudis Occitans,
a acampat son amassada generala per 2019 lo 6 d'abril a Brinhac dins la sala
municipala mesa a sa disposicion per la municipalitat. Lo cercle clarmontés
dels Tega Los assegurava la tenguda materiala de la jornada. La jornada es
estada filmada per Jan Feistner per l’Universitat Pau Valèri.
Micaèla Roques, presidenta dels Tega Los, aculhís los membres de l'amassada
que ven saludar lo Sr Jurquet, conse de Brinhac ; afortís interés e sosten per
la lenga e la cultura occitanas. Na Maria Passieux, vice-presidenta del Conselh
Departamental, assistís als trabalhs de l'amassada.
La sesilha es dobèrta a 10 oras pel
president Albèrt Arnaud. Dins lo
rapòrt moral que presenta, fa lo ponch
sus las activitats de la SD dins l'annada 2018, en insistir sul renovelament e
l'alargament del CA a l'AG passada e sul problèma del foncionament del Centre
Cultural Occitan Lo Camèl a Besièrs. Una discutida pòrta puèi sus aquel ponch
amb las intervencions de Ruth Kaiser sus las dificultats rencontradas e l'ajuda
de la SD, de Miquèla Stenta sus la situacion del Camèl per rapòrt a la SD. Lo president precisa que
lo CCO Lo Camèl es una associacion autonòma aderenta de l'IEO 34 que parteja
amb el lo sèti besierenc. La SD a ajudat
financièrament a las indemnitats de licenciement de l'emplegada. Joan-Marc
Vilanòva ditz la dificultat de faire viure lo Camèl sonque pel benevolat,
Micaèla Roques vei la necessitat d'un emplec salariat, mas cossí l'assegurar ?
Lo rapòrt financièr del clavaire Danís Plancada presenta un equlibri
capitat sens recors a la resèrva d'estalvi.
( De veire lo detalh dins los dos rapòrts ). Los rapòrts son votats a
l'unanimitat dels votants presents o per mandats, mens una abstencion pel
rapòrt moral.
Pel renovelament del CA : sens cap de demission nimai de candidaturas
novèlas, lo CA es reconduch dins sa composicion de l'an passat.
Domenge Caucat, secretari encargat de la comunicacion intèrna e extèrna de
la SD, fa lo ponch de la reorganizacion menada dins lo domeni e demanda als
cercles e mai als aderents individuals
que mandèsson novèlas de sas activitats e adreças precisas.
Lo president evòca lo sovenir de l'amiga Monica Ambroise, membre ancian e
actiu del Cercle de Montpelhièr, sempre fidèla dels nòstres acamps, recentament
defuntada.
Na Passieux merceja l'AG de sa recepcion, ditz son interés e lo del Conselh
Departamental per l'occitan e sa cultura, e per las accions que mena l'IEO.
D'unes membres de l'amassada prenon la
paraula per demandar d'accions del Departament dins maites domenis : torisma,
formacion de personals, revista departamentala, senhalizacion per rotas e
bastiments publics, eca. , e mai un plan d'ensemble de promocion de l'occitan
en seguida de las competéncias novèlas
reconegudas als CD.
La paraula es balhada als representants dels cercles e associacions
aderentas a l'IEO 34 per presentar sas activitats, sos projèctes per l'annada
2019, benlèu sos problèmas ; puèi als individuals sus de questions particularas.
Joan-Loís Blenet alerta sul perilh qu'amenaça l'ensenhament de l'occitan dins la
lei Blanquer e demanda als militants de la lenga de s'adreçar a las estructuras
localas : establiments escolars, institucions, elegits e per çò far de s’agropar
en comitats de defensa de l’occitan. La question de l'OPLO quant a sa natura,
son foncionament, sas amiras, sos mejans, mena lo president a faire un istoric
cortet e a dire los laguis nòstres
L' amassada se clau a 12 oras e mièja.
Un vin d'onor es servit als
participants, seguit del dinnar preparat pels Tega Los. La tantossada es
animada per la prestacion de la Corala de Sant Guilhem bailejada per Felip
Carcassés.
