dilluns, 27 d’abril de 2020

Ciutadin Confinit Confinat


Se sona Confinit Confinat
es lo nom que la vida li a donat
mai que l'aguèsse pas cercat
la pòrta, la pòrta
la masqueta que pendola a son nas
Confinit Confinat es que l'as cercat
d'èstre al revèrs de çò qu'as aimat ?

Als 4 punts del mond
aimava viatjar
ara vira redond
coma un ploc dins son jaç.

Aimava potonar
e brassar los afars
ara es entrepachat
per lo gestum d'Estat.

Aimava onorar
la rentabilitat
lo trabalh a tampat
qual ganha de rès ganhar ?

Se sona Confinit Confinat
es lo nom que la vida li a donat
mai que l'aguèsse pas cercat
la pòrta, la pòrta
la masqueta que pendola a son nas
Confinit Confinat es que l'as cercat
d'èstre al revèrs de çò qu'as aimat ?

Aimava la grand'vila
se risiá dels pecanòts
ara vei que la vida
compta mai que l'autò.

Aviá un borsicòt
a la caissa d'estalvi
la banca fai fiascò
onte passa l'estalvi ?

Se teniá una mòstra
a cadun dels ponhets
mas l'agulha li mòstra
que lo temps se clavèt.

Se sona Confinit Confinat
es lo nom que la vida li a donat
mai que l'aguèsse pas cercat
la pòrta, la pòrta
la masqueta que pendola a son nas
Confinit Confinat es que l'as cercat
d'èstre al revèrs de çò qu'as aimat ?

Aimava tant la França
que li parlava inglés
ara per far pitança
se mascarà chinés ?

Aimava pas votar
o votar con-que-vira
mal o ben se cal far
al destin qu'òm aspira.

Se regala das stars
dels espets et d'espòrts
e ben n'a de comptar
que dessús sos recòrds.

Se sona Confinit Confinat
es lo nom que la vida li a donat
mai que l'aguèsse pas cercat
la pòrta, la pòrta
la masqueta que pendola a son nas
Confinit Confinat es que l'as cercat
d'èstre al revèrs de çò qu'as aimat ?

Trapava natural
lo climat destrachit
E del virus dirà
qu'es Dieu que l'a porgit ?

Aimava visitar
sos parents retirats
e pasmens posquèt pas
lor dire adieu-siatz.

E sos enfants deman
quana vida auràn
la que mena enluòc
o la del país d'òc ?

Ieu tanben soi Confinit Confinat
es lo nom que la vida m'a donat
mai que l'aguèsse pas cercat
la pòrti, la pòrti
la masqueta que pendola a mon nas
Confinit Confinat es que trobador
trobaràs un autre biais d'aimar ?

Claudi Alranq


Cap comentari:

Publica un comentari

Los mai legits