Diga ! Quane rambalh que nos fan, los d’amontdaut. « Lo fonccionament de l’Assemblada Nacionala es clavat ! » « Es la rompedura… » « Lo país es ingovernable ! » « Es fòra question de far l’aleta a aqueles aucèls de la mòrt… ». E òc, mon bon monsur, Jupiter es finit e França deu apréner la democracia, engrunar son monolit republican per ne far un quilhòt que cadun i porgís sa pèira…
Aquí i a d’òbra.
E francament es pas ganhat… Los unes començan per ensajar d'engarçar los autres que fòrt e mòrt fan tot per servar son prat carrat, sa plaça de las bonas, son grop, sas presidéncias, sos vices, sos raportaires, sas comissions pichonas e gròssas, dòna-pissador, questor, ajocador… Ne passe.
Pasmens, pasmens son pas que 577 deputatonetas e deputatonets sortits d’una dotzena de partits politics que se devon endevenir, pas mai.
Vòls que te diga ? Agachave un pauc, en comparason, la situacion de nòstres movements occitans. Quin embolh ! Una lenga comuna deis Aups als Pirenèus saique, mas dialèctes e jos dialèctes ; doas grafias ; de miliassadas d'assos, un molon d’IEOs que digús i compren pas res ; sindicats d’ensenhaires que s’as pas fach d’estudis bèlses ne pòdes pas encapar l’anar ; ensenhament immersiu o a paritat orària amb de metòdes diferents ; collectius d’identitaris descloscats, partits nacionalistas o federalistas, movements politics, ofici public, congrès, academias … Ne vòls, n’as !
Rics de nòstra diversitat, lo sèm. Richasses ! Capitèsson de s’endevenir dins l’emicicli de París per tornar metre l’ISF, nos lo farián pagar l’impòst sus la fortuna ! Mas es pas per deman.
Enfin, per çò que ne dise, ieu.
La guinhada de l’IEO34. E, rau !
Cap comentari:
Publica un comentari a l'entrada