Las asenadas dau Joan Pèire

Lo comte Amadieu de Montagut, senhor de Clarmont d'Erau, partiguèt per la Crosada lo 13 d’abrial de 1096. A son fidèl amic Loís de Gissac donèt la clau de la cencha de castetat de sa femna, la polida Loïsa.
- Tè, garda-la te fau fisança ! Se dins cinc ans soi pas tornat, poiràs dubrir la sarralha !
Lo comte aviá pas solament passat lo pont de Ceiràs qu'es a mens de tres legas de Clarmont, que Loís arriba com’un caluc sus son caval rossèl e li crida :
- Òu Amadieu ! Siás pas innocent ? M’as pas donada la bona clau !

-=oOc=-

 Un correire del “Torn de França” fa a Felip :
- Quin fotut país aquel ont demoratz ! I a mai de còstas que de davaladas!
- Aviatz pas qu’a far lo Torn dins l’autre sens !

 -=oOc=-

A la tele : « Chez Renault, les ouvriers des ateliers de sellerie sont en grève »
Leontin : È ben, s’avèm pas d’api, manjarem de trufas ! 

 -=oOc=-

A l’especiariá del vilatjòt, un òme dintra e crompa totas las tomatas que son per vendre.
- Benlèu, fa l’especièr, son per escampar sus aquel traça de cantaire que ven aqueste ser a la sala de las fèstas ?
- Non pas, pecaire ! respond l’òme. Siái ieu lo cantaire !

 -=oOc=-

- As escotat lo debat entre los dos candidats a la presidéncia de la Republica ?
- Nani, qu’a aquel moment la vaca vedelava ! E tu l’as escotat ?
- Òc ben ! Amai me siái regalat !
- E de qu’an dich ?
- Qu’èran pas d’acòrdi !

-=oOc=-

- E ben Gaston, siás ben polit, ont vas ?
- Partissi en viatge de nòças !
- En viatge de nòças ? Mas ont as la femna ?
- A pas volgut venir !