AL FIAL DEL CONFINAMENT…
Lo
debanament del confinament mena a se pausar questions d’un jorn
l’autre, unas seriosas e d’autras un pauc mens (mas, de qué volètz ?,
cal plan ocupar lo temps) :
- Sòuses : Los
poders te parlan sovent de sarrar la cinta, trapan totjorn una talha o
una taxa de te faire pagar e d’un còp anóncian miliards de dollars,
d’euròs per unes plans de relança. Ont èra amagada tota aquela moneda ?
- Contradiccion : Cossí demandar a l’encòp al monde de demorar tancats a l’ostal e de se portar volontaris per anar amassar majofas e cerièras ?
- En preson : Unas masquetas pels gardians e pas brica pels presonièrs. Logic o discriminacion ?
- Sistèma metric : En
França, nos demandan de respectar una distància d’un mètre entre las
personas. En Anglatèrra, sabètz se demandan a las gens de respectar la
distància d’un yard ? Es que i a viruses francofònes e viruses
anglofònes ?
-Arbitres : Al
rugbí, los arbitres remandavan las equipas fautivas a dètz mètres. Ara,
se deuràn contentar de las faire recuolar d’un sol mètre ?
- Petanca : Es
que las bòlas se deuràn arrestar imperativament a un mètre del let jos
pena d’exclusion e de confinament immediat ? Los tiraires al caumatge
(parcial o total) ?
- Pèrdre lo compte : Anam cap a una olimpiada de cinc ans e una autra de solament 3 ans : aquò va venir complicat de comptar quatre per quatre !
- Vista una vidèo del contaire Olivièr de Robèrt explicar
que lo confinament pausa gaire de problèmas en Arièja : pas de vesin ;
las escòlas tampadas dempuèi un brave moment ; los comèrcis de
proximitat tanben als abonats absents…
- Ora : Amb
lo passatge a l’ora d’estiu, avèm ganhada una oreta sus la durada del
confinament. S’èrem passats a l’ora del solelh, son doas oras qu’auriam
ganhadas !
- Question : Cossí preveire l’imprevisible ?
- Armas : De
qué pensar del comportament dels Americans que corrisson crompar armas
quand se l’i anoncia lo confinament e dels armurièrs que demandan
d’èsser classats coma vendeires de primièra necessitat. Lo President
jura sus la Biblia dels 10 comandaments : Tuaràs pas !
- Plasers auditius : Ausit monde contents d’escotar lo cant dels ausèls e lo bruch del vent dins las fuèlhas o de las gotas de pluèja sul teulat.
- Problèma auditiu : Ausit monde perduts de pas mai ausir lo rambalh costumièr de las veituras per carrièra, en manca total de bruch...
- Un elefant engana de primièra : Vist un coble qu’a un ostal al pè de l’aeropòrt d’Orly, espantats de se poder parlar dins l’òrt !!!
- Lo retorn de l’An-01 ? : Sòmi pòst-68 de retorn a la natura, de la lectura de la Gueule Ouverte, de l’espelida de las preocupacions ecologistas. E una cançon de Claudi Martí : « L'an
01 es arribat, / Nos cal tornar recomençar / Lo vièlh solelh es amagat,
/ Mòrta la terra, mòrta la mar. / E siam montats dins la montanha /
Avèm las baumas per ostal / Un jorn inventarem l'araire. / Ara siam
lops, ara caçam. / Cal pas mancar... lo novèl monde ! » Se tot èra a tornar començar ?
Cap comentari:
Publica un comentari a l'entrada