L’AGACH D’IVONA DEL CERCLE
OCCITAN DE MÈSA
Aquel es pro negre per la sason. Segur que se confinha
dins son jardin. Òm pòt dire qu’es fortunat. Son jardin atanben. Será pro bel aqueste an. Es pas
coma aquel, blanquinós coma un fornièr, qu’a degut se rosigar dins son
apartament, tanplan amb la femna e una còla d’enfants. Se se supòrtan sens
s’entretugar, a fòrça d’estre entrefurats coma de conilhs al terrièr, an de
meriti ! Vaquí coma la crisi del coronavirus fa ressortir, pas qu’a la
color de la pèl, lo nivèl de vida del mond, encara qu’aquò siague un vejaire un
pauc simplet sus la situacion. Mas es vertat
qu’avèm lo temps de soscar.
Tenètz, vesètz aquel pichòt coble d’adolescents tan polit ! Eles, cadun lo
nas dins son telefonet, riscan pas de s’escopir dessús… Per contra, urosament
que los ecrans fan barratge se que non, tre qu’un serà enfenolhat, va empegar
totes sos « contactes » amb aquel virus qu’arrèsta pas de far parlar los muts e
los autres.
E lo papeta e la mameta qu’an pas vist lor familha dempuèi fòrça temps,
demòran confinhats dins lor ostal o dins l’ostal de retirada, per contunhar de
viure a l’abric del maissant mau, que el, los vièlhs los manca pas. Coma ne van
sortir, se ne sortisson, d’aquela espròva ? Qual o sap ? Es un
còp a venir mabol. Sens comptar que mai d’un a ja pres lo camin de sa
darrièra demòra quasiment tot solet, coma un darrièr sacrifici fach als
vivents.
E la vida contunha a son anament novèl. Aquel dins son breç, pecaire, a sa
naissença faguèt la coneissença de sos parents amb la masqueta sus lo morre.
Tanplan s’es demandat se seriá pas tombat dins una familha de tirons al bèc
ponchut !
Per tot aquò l’avenidor es pro incèrt. Ont anam ? Aquò me fa pensar al
Profesor Nimbús de mon enfança, amb son peu unenc sus la tèsta en forma de punt
d’interrogacion e son costat un pauc lunari...
Anem, cal arrestar de far bolegar las neurònas e tornar a la vida vidanta.
Per començar me’n vau faire un cabuç dins lo congelador per desconfinhar un bocin
de pan per lo dinnar, puèi veirèm.
Mèsa lo 7 de mai de 2020.
Cap comentari:
Publica un comentari a l'entrada