« Carida, m’estrechiguèron la quequeta ! »

  La guinhada de l'IEO34 sus ràdio Lengadòc 

Picatz sus l'image i tombaretz.

Diga ! Es lo paure Padena que disiá que dins la Despacha i a pas jamai una conariá per linha, n’i a totjorn tres o quatre. E, pas que per vautres, ne pesquère una de las carabinadas, fa quauques jorns : lo covid 19 provocariá un aflaquiment general de la bistoqueta amb tanben una constriccion e un acorchiment dau penís de 4 o 5 centimètres, pas qu’aquò. L’ora es grèva. Lo govèrn a bèl dire que va lèu préner de mesuras, ne conoisse un fum de masclasses fierabraces que se trufavan de la malautiá e se la jogavan desdenhoses qu’an ara la petarrufa de se l’agantar.

Aquela empega ! seriá un pauc colhon de refusar lo vaccin per enriquesir pas Pfizer e puòi, per luchar contra los efièches segondaris dau mal rosigaire de préner lo viagra  que fabrica lo quite Pfizer…

Bon, los cercaires cèrcan. Los estudis se succedisson, pensatz. D’unes anèron agachar de prèp de qué ne virava de l’espaghetti dels italians tocats per la reba, semblariá que siaguèsse « fondante ». D’autres, i veson per pròva que los chineses que nos engimbrèron aquela marrana tenon pas, de notorietat publica, los calçons los mai plens dau mond. Aquò sens defugir la question essenciala : de qué ne vira per un covid long ? D’ont mai es long, d’ont mai es corta ?

E ne sabe un fum que d’amagat, d’escondons, fan dins l’autotèst en s’agachant cada cinq minutas lo fons de l’eslip.

Vòls que te diga ? Plores pas mon amic, te dirai amb Macarèl que « tan val un pichòt desgordit qu’un grand estabosit » e contunharai de me pensar, amb lo nòstre Enric, que lo viech es un òs, e un òs se pòt pas estrechir coma aquò.

Padena aviá rason, i a pas que de conariás dins la Despacha.

 

Enfin, es çò que ne dise, ieu.

 

La guinhada de l’IEO34. E, rau !