Joan Guilaine canta la Mitona
Lo paraulièr plaça sos uèit tèxtes entre languison e coquinariás (2 tròces musicals : La marcha de Trencavèl e Tèrra erètja complètan la publicacion). Dins l’entrepresa, segur que recebèt l’ajuda espirituala de La Mitona, aquela fada encantada que se trapa dins Lauquet e que sortís la nuèit per faire la bugada amb son bacèl d’aur. Embruèissa los joves temeraris : emmascats, desapareisson amb ela dins lo monde misteriós de jos l’aiga.
Joan Guilaine a causit una alternància entre cançons gaujosas e aires portats sul tristum.
Costat jòia, La Fèsta del paratge vos empòrta dins l’estrambòrd embriagant de las fèstas de vilatge al temps dels trobadors e del Ramon de Miraval. La mameta conselha a Antonin de se maridar, lo buta cap a l’una o l’autra (filha de pastre, de mercand o de faure) , mas el, fòrt e fèrme, li agrada mai sa libertat de celibatari.
Amb La polca de Lolà, l’amor es un regal (o pas) permanent que non se pòt estavanir. Dins La valsa del factor, seguissèm la carrièra del prepausat de la pòsta : a pè dins lo temps, abans de faire la virada en bicicleta, puèi en petaron e, fin finala, en veitura. Consequéncia : de mens en mens de temps per contar floreta amb las destinatàrias dels corrièrs !
Costat tristum, dintram dins la cançon sociala amb La sirventa del castèl aclapada de trabalh de punta d’alba a solelh-colc e que sòmia d’un monde melhor. La cançon Janet, abòrda lo tèma universal e intemporal del retorn de guèrra. Lo païsan es enrotlat per anar faire guèrra dins un país lonhdanh. Lo Janet i daissarà la vida e demorarà que los uèlhs per plorar a la Janeta.
Las morniflas es un grand jòc lexical de lenga occitana, una mena de revira-vai-te’n bèl e redoblat dels tèrmes dels castigaments dels pichons qu’èran pas de manca : carpan, morniflas, calòtas, ancadas, còps de tricas, bastonadas, raspada, emplastre, trucs, cofal, bofas e talòchas,…
Aqueste albom La Mitona es una òbra collectiva e d’amistat a l’entorn de la musica, del cant e de la lenga d’Òc qu’a ramosat musicians, coristas, illustratritz, tecnicians per capitar la realizacion e la concretizacion d’un CD original e biaissut que se cal procurar sens pèrdre una minuta. Vos cal pas mancar aquel plaser auditiu, bon per la comprenèla e per l’imaginacion (cadun en cèrca de sa mitona e caduna de son marmiton ?). Alara, passatz comanda en mandant un chèc de 13 € (10 € pel disc e 3 € pel mandadís) a l’Associacion La Mitona 17, rue du Razès 112300-Limós (chèc a l’òrdre de : Associacion La Mitona).
Emmitonat Roch
Cap comentari:
Publica un comentari a l'entrada