Mescladís, de Bobí lo Contejaire. (Robèrt Pastor) Cada dijòus dins Midi Libre, Pays coeur d'Hérault, edicion de Lodèva.
Las vendémias son acabadas. Ara dins lo nòstre canton de « Còr d'Erau », es la culhida de las olivas, subretot las Lucas (olivas « verdas » que son plan bonas per l'aperitiu!) . Puèi aurem las castanhas amb lo vin novèl !
Mas cossí plan escriure los noms de fruches e de legums ? Vaquí : rasim, oliva, persega, milgrana, castanha, amora, atmèla, cocordeta, ceba doça, cese,..Se pòt trapar d'autres noms dins lo « Lexic normatiu francés-occitan de botanica » (lengadocian e provençau) de Josiana UBAUD lexicografa e etnobotanista en domeni occitan .(veire contacte)
Per acabar sus la frucha, un conte tradicional, qu'ai adaptat : « Las figas de Clarmont »
Un còp èra, i a fòrça temps, a Clarmont d'Erau, i aviá una figuièra que te fasiá de figas coma de melons !
E cada annada, las primièras figas èran per lo Senhor de Lodèva ! Aquesta annada èra Batiston que deviá portar las figas al Senhor. Èra mai que mai urós : veire lo Senhor de Lodèva, quin astre !
Ne prenguèt tres dins la saqueta (las mai polidas) e cap a Lodèva.
Lo solelh rajava, una calor a far tombar la coa dels ases ! Al cap d'una ora aviá acabat l'aiga e aviá encara set.
Se diguèt : « Aquelas figas son mai que mai polidas, pòdi ne manjar una, lo Senhor se contentarà de doas ! ». Prenguèt una figa, te la copèt en dos e se la mangèt.
A Cartèls aviá lo ventre darrièr l'esquina ! « Pòdi en manjar una autre, lo Senhor se contentarà amb una ! » E faguèt aital, copèt la figa en dos e te la chapèt lèu fach !
Arribat al castèl del Senhor, susava, susava !
Lo Senhor lo recebèt e diguèt :
« De qué se passa Batiston, que tressusas aital ?
-Fa fòrça caud, Senhor !
-As pas begut ? »
Batiston èra un pauc vergonhós.
«Òc d'aiga e...
-E ?
-Ai manjat ...una figa !
-Fa pas res, son plan bèlas, me contentarai de doas.
-Mas...
-Mas ?
-Aviái encara set e talent...
-De qu'as fach ? »
E Batiston prenguèt la darrièra figa, la copèt en dos e la mangèt davant lo Senhor bocabadat !
E cric e crac mon conte es acabat !
A lèu, e tenetz vos fièrs !
(contacte:http://josiane.ubaud.pagesperso-orange.fr - jb.ubaud@wanadoo.fr)
Cap comentari:
Publica un comentari a l'entrada