IDIR, CABILIA, OCCITANIA…
En
omenatge al cantaire Idir, grand umanista, defenseire e promotor de la
cultura berbèra, dobèrt a las culturas del monde, vaquí una revirada en
lenga nòstra del tèxte de la cançon seuna la mai coneguda.
Lo tèxte d’A Vava Inouva (A
mon paire Inobà), s’apièja sus un conte vièlh (coneissètz contes joves
?) de Cabilia, ont la filha va portar a manjar a son papeta fòrabandit
pel tajamaât (l’acampada
del vilatge). A la fin de l’istòria, los enfants escotan las istòrias
d’un còp èra e los racontes de la vida dels aujòls dins l’esperit de la
necessària transmission entre generacions, dins aquel ligam que se teis
entre ièr e deman, entre passat e avenir, ligams que fan l’identitat
dels pòbles. Un messatge universal. Adieu, Idir ! De temps encara,
reprendrem tos cants e tos repics…
A
Vava Inova / Txilek elli yi n taburt a Vava Inouva /Ccencen
tizebgatin-im a yelli Ghriba / Ugadegh lwahc elghaba a Vava Inouva /
Ugadegh ula d nekkini a yelli Ghriba
Ò paire, te’n prègui Inobà, dobrís-me la pòrta.
Òu, ma filha Ghriba, fai tindar tos braçalets.
Crenti l’ògre del bòsc, paire Inobà
Ò, filha Ghriba, lo crenti tanben.
Lo papet estropat dins son burnós
A l’escart se rescalfa
Son filh preocupat pel ganhapan
Passa en revista los jorns a venir
La nòra darrèr lo mestièr de tèisser
De longa remonta los tendeires
Los mainatges enròdan la mameta
E aprenon las causas d’un còp èra
Ò paire, te’n prègui Inobà, dobrís-me la pòrta.
Òu, ma filha Ghriba, fai tindar tos braçalets.
Crenti l’ògre del bòsc, paire Inobà
Ò, filha Ghriba, lo crenti tanben.
La nèu s’amolona contra la pòrta
Las papas (yehlulen) prenon lo bolh dins la topina
L’amassada sòmia ja de la prima
Luna e estelas demòran embarradas
Lo soc de garric remplaça las canissas
La familha recampada
Para l’aurelha al conte.
Se furgatz sus Internet, traparetz imatges de l’Estivada de Rodés de 2012 e ausiretz Idir interpretar lo Se canta. Los aucelons cantan tanplan en berbèr coma en occitan ! https://vimeo.com/
Cap comentari:
Publica un comentari a l'entrada