La guinhada de l'IEO d'Erau
sus RÀDIO LENGADÒC
(Picatz sus l'imatge, i tombaretz)
Una bilheta setmanièira, un agenda suls eveniments portats per los cercles d'Erau. (Quand n'i aurà...)
Diga ! La
dimenjada passada se deviá debanar las jornadas famosas de la cançon occitana
de Mèsa mas lo virus las faguèt bescantar e copèt la chica de totes aqueles
còrs belòis dau departament d’Erau e d’Occitania tota. Paure mond, que trabalhèron
d’annadas a de reng jos la ferula de caps de còrs despietadoses que se tiran la
borra per aquel rendètz-vos prestigiós e mancat. Paures cantaires, que somièron
tot l’an de crosar cinq minutas sus l’empont lo presentator vedeta de ràdio
Lengadòc e d’encontrar enfin son public, un public meloman e avisat que se’n
chauta de la musica coma d’una petòla de cabra mas que per un subjonctiu
matrassat, au bestorn d‘una frasa, es capable dau pièger…
Vòls que te diga ? En
agachant lo mond quichats coma sardas en barrilh sus la plaça de Sant Guilhem o
a la plaja de Magalona –de naturistas sens masquetas ! -, òm se podiá
demandar plan justament se los organizaires avián facha la bona causida en anullant
lo rescontre bèl de tot un pòple. Pasmens, s’agacham dau costat de las Americas,
vesèm que dins un rescontre de 61 coristas, 53 se son faches empegar per las
gotetas de las nòtas -falsas o bonas, vai te’n saupre ?- en suspension.
Imagina-te qu’aquò advenga a l’elèit de la cançon nòstra, qu’Occitania siague
privada de sos organs mai bèls, que las maissas grandas se calen a jamai, que nòstra lenga se faga pas pus ausir en
passant sus la tèrra que sèm… Quand i a la malaiga, se cau absténer.
Enfin, es çò que ne
dise ieu.
La guinhada de l’IEO34. E, rau !
Difusion sus l'antena de ràdio Lengadòc
Diluns : dins la matinala (~8h20)
Dimars : dins lo Resson del Vespre (~17h45)
Dimecrès : dins lo Miègjornau (12h/13h)
Dissabte : dins lo Resson del Vespre (~18h20)
Dimenge : dins la matinala (~7h05)
Cap comentari:
Publica un comentari a l'entrada