La guinhada de l'IEO d'Erau
sus RÀDIO LENGADÒC
(Picatz sus l'imatge, i tombaretz)
Diga ! Vesèm
enfin venir, Ò ma sòrre Anna, non pas la rogieiròla dau matin mas la tòca
finala d’aquelas eleccions municipalas e èra temps que s’acabèsson los
patricolatges, manipòlis, las menèstras pudentas, chauchinas e chichomèias
fastigosas, aliganças desnaturadas, los « un per totes e los totes
contra un ! ». De costuma l’entre dos torns èra pas quicòm de polit
polit mas aviá lo meriti d’èsser cort emai lo Rubicon siaguèsse encambat tròp
souvent per los unes e los autres. Mas aqueste an lo Rubicon dona d’èr au
Merdanson, un flume grand e fumant de tres meses de larg…
Vòls que te
diga ? Quina engaunhadissa ! Aquò me fa venir los rires aquelas
eleccions quand es pas lo vòmit que monta : un primièr torn mantengut a
tot pèrdre que lo virus manhac coma la nívol de Tchernobil d’un còp èra
esparnhèt los burèus de votason ; de candidats en campanha embarrats a
l’ostau ; puòi lo país dels Potonorses enebit de potons amb de tòcamanetas
au coide a coide sus los mercats que podián pas pus solament balhar una manada a
sos electors potencials e que van saique ara tocar lo caumatge parcial…
Son pas lèstas per tombar las masquetas dels politics e los candes, los
idealistas, que pauròts se portèron amb eles, an ja perdudas sas illusions,
abans que de començar. E, fin finala, vai te’n saupre quau la cargarà
vertadièirament la masqueta de blau, de blanc e de roge dimenge de ser ?
Enfin, faguèron plan d’esperar la dobèrtura de totas las pèscas. Mas
mèfi, dins quina aiga trebola anatz faire saussòla amb vòstra linha ?
Enfin, es çò que ne
dise ieu.
La guinhada de l’IEO34. E, rau !
Cap comentari:
Publica un comentari a l'entrada