PAPIERÒT MENERBÉS de l'Alan Roch

CHINA, NÒSTRA VESINA

Pichon estudi sus las relacions entre Occitania e China que se pòdon concebre dins mai d’un domèni, per dobrir los camins d’una sinologia occitana qu’es per l’ora gaire vesibla e pas brica reconeguda.

• Carnaval : Se sap plan (l’avèm ja dit mai d’un còp) que Limós es una plaça avançada de las relacions amb Asia amb la practica annadièra e sasonièra de la China.

• Dins Mistral, Tresòr dòu Felibrige : « èstre dins la Chino : être à la dernière extrémité, dans une extrême misère. Chinés : bruant des roseaux, à Montpellier (chi-de-palun) ; bigarade, espèce de citron (bigarrado). »

• Evolucion : Dins lo temps, i agèt la Longa Marcha. Ara, lo monde van faire de trails o de trekkings en China.

• Pichon libre roge : L’òbra maja del president Maò virèt plan lèu al roge sang.

• Comunisme : De l’òbra de Carl Marx, fin finala lo Partit Comunista Chinés n’a retengut lo títol per ne faire l’alfa e l’omèga de sa politica : Lo Capital.

• Deviacionisme : La sola freta dels 4 que coneissi, aquò’s los tres mosquetaris.

• Hong-Kong : Dins l’anciana colonia britanica, crentan plan que lo grand vesin se prengue per King-Kong.

• Geografia : A Pequin, son un pauc tròp coquins. A Canton, los dròlles jògan als quatre cantons.

• Suplici chinés : Segur qu’es dolent e pas aisit de faire passar qualqu’un-a pels traucs d’una passadoira.

• Filosofia : La pensada de Confuciús es un brave pauc confusa per mon entendament. Pareis que Laò Tseu zozotava (tsotsotava?) : « Tseu, tseu, tseu !…»

• Beguda : Cada ser, a cinc oras, lo jutge Ti beviá sa taça de tè.

• Cosina : Amai se siás un tamborn sens pèl, arribaràs plan a manjar amb baguetas.

• Legums : Chou-En-Lai voliá pas dire que los Chineses manjavan pas de caulets.

• Maxima : L’uèlh del païsan paure vei juste, sustot s’a pas escampat pesticidas pels camps.

• Pollucion : Lo jorn ont los Chineses descobriràn l’ecologia, la planeta respirarà plan melhor.

• Maçons : Segur que dins los aujòls del president Trompeta se trapa un Chinés. Demòra de saupre s’aquel rèire-papeta èra lo conceptor o just un maçon de la bastison de la Muralha bèla !

• Delocalizacion : Vist un dessenh umoristic amb una familha sens vestits, sens veitura, sens telefonilhet, sens television, sens…, un còp enlevat tot çò que veniá/ven/vendrà encara de China.

• Calendièr : Lo calendièr basat sus la Luna es quicòm a i pèrdre son chinés, e tanben son occitan. Se lo nòstre Fabre de las Aiglantinas balhèt als meses noms meteorologics o de recòltas, los Chineses dedican annadas, mesadas e oradas dempuèi 30 sègles a un animal : lo rat (la mirga ?), lo buòu (lo bufre ?), lo tigre, la lèbre (o lo lapin, qual sap ? ; o lo gat !), lo drac, la sèrp, lo caval, la craba (lo boc ; la feda), lo monin, lo pol, lo gos e lo tesson. De temps en quora, cal rajustar un mes al calendièr de l’an. Es aquí que lo poèta traparà una annada de las tretze lunas…

• Conclusion : Demòra encara plan a faire per l’intercompreneson entre los pòbles ! 

Chin-Chin Roch