DE DARRÈR LA MASQUETA…
Un subjècte original per aquesta cronica agostenca !
- Masquetas : D’entrepresas
se botèron a fargar masquetas ; dins las associacions, las mametas
tornèron prene las agulhas, se piquèron lo cap dels dets que los dedals
èran perduts ; usinas se reviscolèron : l’inutil èra vengut
l’indispensable ! Un còp desconfinhats, lo pòrt de las masquetas se
demultiplicant, es en tota logica que lo monde se vira cap a la crompa
dels amaga-morres qu’arriban de China.
- Escampatge : La
masqueta es faita per empachar la propagacion del virús. A un moment,
la cal lavar o la cal escampar. Mas cal pas prene lo mot escampar al
sens primièr e gitar l’objècte para-medical onte que siague, pel sòl o
luènh d’un escobilhièr. Es fòl lo nombre de primatas primaris qu’an pas
tot comprés !
- Lo virús intelligent : Entre
los endreits ont cal pas èsser mai de cinc, mai de dètz, mai de cent,
mai de mila, mai de cinc mila, mas amb la possibilitat de s’agromelar
dins los trens (i comprés lo tren de Bisan ?) e lo metrò, val mai saupre
comptar e estimar lo public (chifra de las autoritats, dels
manifestants o de la realitat ?). Cal tanben aver una granda capacitat
per saupre las carrièras ont la masqueta es obligatòria e los endreits
ont se pòt daissar de costat…
- Oraris : Pus
fòrt encara : las comunas qu’oblitjan de portar la masqueta de 10 oras
del matin a 6 oras del vèspre. Estiman qu’a 18h01 lo pichon coronat es
pas mai dangeirós : es tornat a son ostal, pausa las olivas de Menerbés
sus la taula, destapa una cantina de pastagàs, de blanc o de rosat e fa
l’aperitiu amb los collègas ! (arguments similars quand lo pòrt es
obligatòri pas que de nuèit !)
- Vòstre morre : D’ans,
nos entantarinèron amb l’obligacion de veire lo morre de las gens dins
las manifestacions. Ara, nos entantarinan amb la necessitat de l’amagar.
Question subsidària : las dònas que pòrtan lo chadòr devon tanben
portar la masqueta ? Sus o jos lo chadòr ?
- L’accent : Dins
l’afar, i avèm ganhat un primièr ministre novèl. Sens jutjament de sa
politica, del costat de París, te le decredibilizèron d’entrada. A plan
pogut sortir de l’ENA, rebalar dins los ministèris e las missions bèlas
dempuèi d’ans, fa pas res : lo paure ten un accent del terrador e de
tresena mièg-temps ! Matinhon serà pas per el una vida de castèl !
- Occitanituda : Mai
piòt encara es quora l’interessat se met a jogar lo ròtle que li
impausan. A tengut de dire que, coma òme del Sud (valent a dire del Nòrd
de Pirenèus e de la Mar nòstra), èra evident qu’èra pel rugbí (coma un
anglés, un escocés, un irlandés o un galés que son pòbles d’Euròpa del
sud coma cadun sap) e tanben per las corsas de taures (una practica
importada d’Espanha per una imperatritz e doncas d’interès popular) ! E
d‘unes s’estonan encara que i age pas de secretariat d’Estat pel
ben-èsser de las bèstias ! E per çò qu’es de la presa en compte de las
lengas (de l’occitan e del catalan, ne sap un bocin, non ?), veirem de
segur, e coma de costuma, un autre còp…
Occitan-res Roch
Cap comentari:
Publica un comentari a l'entrada