FRANCAMENT, N’AI PAS DE BESONH !
Cronica pareguda dins lo recent n° de Lo Diari (revista de l’IEO-Region Occitania-Pirenèus-
La
publicitat es una brava agression visuala, auditiva, telefonica e
informatica. Las anóncias passan las termièras dels indesirables e, dins
tos corrièrs del Net, te trapas fàcia a tot çò que vòls e, mai que mai,
tot çò que vòls pas, sustot dins l’inutil.
Alara, francament, vos disi que n’ai pas de besonh de totas aquelas causas totalament I-NU-TI-LAS :
un
modèl novèl de conflaire revolucionari de ròdas de veitura ; un
descalcarisador d’aiga installat per un professional ; dos meses a
res-non-còsta d’assegurança-autò ; 10 € de reduccion per la crompa de 45
€ d’estilòs ; un termomètre infraroge numeric ; vins e champanhas en
venda privada a preses imbatables ; l’I-Fòne 11-prò (aparelh fòto,
escran e tot e tot) ; una estampaira novèla ; remesas dins un grand
magasin parisenc ; una ofèrta pels 85 ans del jòc del Manipòli ; èsser
pagat per respondre a unes sondatges ; lo placard e las panièras ont tot
se recapta solet (m’estonariá !) ; las necessàrias camèras de
vidèo-susvelhança per mon entrepresa ; unes cotèls japoneses que trencan
mai que plan (mai qu’un de La Guiòla?) ; un apartament dins una
residéncia novèla a Roen ; una cinta per susar ; 20 lamas de rasor, amb
lo margue ofèrt (an pas vista ma fotografia ?) ; 2000 articles
indispensables per l’òrt, lo bricolatge e l’ostal ; unas joguinas
sexualas (sortida de confinhament) ; un libre fotografic personalizat ;
unas cartas de visita a mon idèa ; la pausa de panèus fotovoltaïcs ; una
prima per tastar còcas ; una reduccion suls solièrs esportius ; pus
fòrt : aqueles solièrs en dirècte de l’usina ; la bona utilizacion de la
vitamina C ; conselhs d’un engèni de l’e-servici ; 308 € d’estalvis sus
mon assegurança-veitura ; aspirators, netejaires e purificators
d’interior (d’exterior contra lo coronavirus, n’i a pas ?) ; la pompa
revolucionària pels abdominals ; una assegurança pels obsèquis ; un
metòde per aprene las lengas en un res de temps (de causir entre :
anglés, castelhan, alemand, italian, portugués, suedés, turc, olandés,
polonés, indonesian, norvegian, danés o rus ; pas l’occitan ?) ; tornar
amainatjar mon burèu a l’ostal ; magrir amb un regime sens regime (o
quicòm atal) ; un investiment dins plaças de pargue d’automobilas ;
ostalons pels aucelons (dins lo temps, se ba petaçavan solets !) ;
l’adesiu que ba repara tot e lo demai ; un nombre illimitat de films e
serias en estriming ; un prèst de moneda en linha e en quauquas minutas ;
unes accesòris per la piscina (qu’ai pas) ; una tondeira de pelena ; un
barbacoa Napoleon ; un parasolelh-modèl novèl ; un sistèma de
susvelhança informatic dobèrt sul Net mondial ; la descobèrta del
patrimòni regional e dels espòrts de plena natura dins Jurà ; una
maquina per afranquir lo corrièr ; un difuseire a freg e per ultrasons
d’òlis essencials (avets de Pirenèus e cèdres d’Atlàs) ; (ad libitum) …
E l’òme de la prada verda d’ajustar : e un ratonet ruscadièr !
Sollicitat Roch
Cap comentari:
Publica un comentari a l'entrada