"L'accent es la sang de la lenga occitana
sus las mans de l'Istòria de França."
La guinhada de l'IEO d'Erau
L’accent de Joan Castex
Diga ! N’ausiguèrem d’asenadas estivencas, sus un ministre qu’a dins la boca los calhaus dau Canigon, un accent que dona d’èr a las vacanças o au tresen temps de rugbí, e que pòrta la nolença de la mangisca de Maïté… (sic)
Vòls que te diga ?
« Monsur lo primièr ministre, avètz, … e ben, avètz un accent, qué, un accent fòrça bèl.»
- A non, sètz cortet, jovenòme, se ne poiriá dire mai,
Aquò, per exemple, en ne cambiant lo biais :
Sospeschós : Amb lo virus, segur, per l’examèn de ministre
Aqueste an, es de plànher, faguèron pas passar l’orau …
Macarèl, cau subretot pas que quauque tele vos enregistre,
Advenguèsse, seriá lo finimond e tocariam lo fons dau trauc.
Pedagògue : Vos fariá mestièr, Monsur, amb un accent coma aquò,
de corses de diccion auprèp la Rosalina Bachelot.
Istorian : Es en cigalejant que faguèretz tombar los murs de Bregançon ?
Gelós : A Marselha fan la bèba, Ò Bona Maire, se sofrisson Melenchon.
Agricòla : Passèretz per l’ENA ? saique a curar los estables,
Coma se dins la França dau Nòrd, aviam pas pro d’incapables ?
Legislatiu : Los paures deputats portats au penequet,
Per las questions au govèrn, demandaràn de caçolet.
Crentós : anèssetz pas a Beirot qu’an pro de malastre,
De vos ausir cantant, lor fariá un crane emplastre.
Internacionau : A cada discors novèl, la Maire Merkel,
Serà en vacanças, nusa en platja d’Agde mas pregarà lo Cèl !
Celinian : Mancava un Narbonoïda embastardit còsta Trump e Potina?
Es lo pompom sus Garona, l’ONU a la sauça mondina !
D’esperit coma un céser aguèsson agut,
vaquí a quicòm pròche, çò qu’aurián escalcit,
jornalistas someses, esclaus aparisenquits,
mas an pas, pauròts, que lo parlar de ponchut…
Enfin, es çò que ne dise ieu.
La guinhada de l’IEO34. E, rau !
Cap comentari:
Publica un comentari a l'entrada