PAPIERÒT MENERBÉS

 

• Aqueste dijòus 10, La Semaine du Minervois publiquèt lo tèxte La còsta dels Cipressièrs que foguèt mandat dins lo Jornalièr audenc del 30 d’agost.

Aquesta setmana, vaquí doncas una presentacion del Viatge entre las doas Mars, publicat pel Jornalet dimenge passat.

De notar que lo diluns 28 de setembre, per l’etapa al Somalh, sul còp de 6 oras del vèspre (o 6 e mièja, demòra de precisar) : un moment lectura-tasta de vins permetrà d’escotar Mirelha Braç e Alan Roch legir passatges dels libres Ieu, Joan Pigassa, obrièr del Canal / Moi, Jean Pigasse, ouvrier du Canal

• Tornar ligar los canals al territòri

Ueitena edicion del viatge que cèrca de tornar nosar los ligams entre los canals e los territòris traversats

Aquò’s l’objectiu del Viatge entre Las Doas Mars proposat pel uèiten còp per l’associacion Viure lo Canal (enfins : Vivre le Canal) amb lo viatge que religa Bordèu al nòrd de Lion, viatge entamenat a Omps (lo 18 d’agost), puèi Castèlnau d’Ari (lo 21 d’agost), Damazan (lo 3 de setembre), Castèts en Dòrta (lo 6 de setembre) e que se va persègre amb d’etapas a Bordèu (8 al 13 de setembre), Agen (16 de setembre), Tolosa (19 al 24 de setembre), Lo Somalh (28 de setembre), Seta (del 1èr al 3 d’octobre), puèi fòra Occitania : Lion (9 al 12 d’octobre), Chalon (15 e 16 d’octobre) e fin del viatge a St-Jean de Losne (18 al 20 d’octobre).
* La tòca del viatge
La tòca primièra del viatge es de tornar nosar los ligams entre los canals e los territòris traversats. Lo canal de Riquet es benlèu marcat al patrimòni mondial de l’UNESCO, mas se deuriá pas acontentar d’èsser liurat d’un biais quasi-complet al sol torisme fluvial portat mai que mai per d’entrepresas anglesas!
* Lo Tourmente es una polida gabarra…
La gabarra Le Tourmente, aqueles que seguisson los espectacles del festenal Convivéncia la coneisson vist qu’acompanha cada an lo debanament dels espectacles.
La gabarra va fièrament sus sos 90 ans. Nasquèt en 1935 dins un chantièr olandés, a Millingen. S’apelava Coaltar e amb son besson Bitumen transportavan de quitran liquide entre las rafinariás de Blaia e Tolosa. En 1975, cambia de nom (l’OÔ) e de mestièr : servís a tirar sablas e gravas de Garona. I pren unes trucs que ne pòrta encara las marcas. En 2000, es crompat per un projècte associatiu que veirà pas lo jorn. Es aquí que ven Tourmente: crompat per batelièrs novèls que lo vòlon tornar a sa foncion iniciala, lo transpòrt de mercandisas. En 2007, mena vin de Besièrs a Bordèu.
Acompanha dempuèi 2001 lo festenal Convivéncia e pren part a unas manifestacions bèlas per faire conèisser la batelariá non solament son istòria mas tanben las perspectivas dobèrtas pels combactes ecologics pel climat: participacion al congrès mondial dels canals (Tolosa, 2013), viatge Bordèu-París a l’escasença de la COP-21 (2015), …

 
* Long del viatge
Menat pel capitani Joan-Marc Samuèl e segondat per la comunicacion per Catarina Jauffred (qu’èra fa gaire cap-redactritz de La Semaine du Minervois), la gabarra es doncas partida dins un viatge novèl per ligar Mar Granda e Mar Nòstra e mesclar la cultura, las animacions, los rescontres amb la question economica de las solucions e proposicions pels transpòrts de mercandisas e las problematicas ecologicas.

 
* A cada etapa:
— se pòt véser una mòstra “De la tira a l’idrogèn”, amb la part istòrica e la part prospectiva de las possibilitats d’utilizacion d’un idrogèn verd per la propulsion dels batèus.
— descobriretz los produits regionals mercé al comptador, produits qu’an esvitat lo transpòrt per la rota.
— lo plastician-filosòf Franck Dautais s’es fait membre de l’equipatge (marinièr !) per presentar sos automatas sul tèma de la decreissença e téner un blòg.
— a unas etapas Tolosa, Seta e Lion (aprèp Omps), unes rescontres se tendràn sul tèma “Fluvial e territòri”. Se parlarà tanben de circuits corts, de planificacion dels transpòrts,…

Se pòt montar a res-non-còsta sus la gabarra cada jorn a cada etapa de 10 oras del matin a 7 oras del vèspre.
* Lo Tourmente vos espèra !
 Avètz pas lo pè marin ? Fa pas res : profitatz del passatge de la gabarra per vos entresenhar, descobrir un passat ric, una accion al present e unas perspectivas ciutadanas per deman.