L’UÒLH DEL BUÒU
LA BILHETA DE L’IVONA DEL CERCLE OCCITAN DE MÈSA.
Urosament que lo banhador es pro grand, que quand me vesi de matin, ai l’enveja de lo copar aquel miralh. Me reteni e comenci per pausar las lunetas. Puòi reculi de dos passes ; aquò va melhor...pasmens òm disiá qu’èri polideta fa encara qualques annadas...
Urosament - enfin es un biais de parlar - quand nos passejam per carrièras, ara avèm la masqueta e nos tenèm a distància, per agantar pas LA Covid, e per pas bailar 135 èuros a la polícia, qu’aquel mond fan pas dins la fantasiá.
Mas tot a una fin, e per de qué pas lo Coronavirus? Cossí anam faire quand tombaràn las masquetas? Se caldrà metre sus la cara quicòm, que sabi pas coma se ditz en occitan, mas que sembla a un bon quilo de farina se, de còps que i a, avèm la man un pauc pesuga. Per dessús un planponh de campanha en boita e de “trompa-colhon”, e buta, farà “la rue Michel”.
E per precaucion, lo temps de s’abituar a nòstre novèl “look”, caldrà contunhar a s’agachar de luònh. O fasèm ben dins los musèus per s’extasiar davant las òbras dels pus grands mèstres de la pintura !
Yvonne BEAUME.
19 OCTÒBRE de 2020.
Cap comentari:
Publica un comentari a l'entrada