I a quicòm que truca !

  L’UÒLH DEL BUÒU

LA BILHETA DE L’IVONA DEL CERCLE OCCITAN DE MÈSA.

 

   I A QUICÒM QUE TRUCA.

 

De còps que i a, aimariam ben tornar faire l’istòria d’un autre biais, tant las causas viscudas sont plenas d’orror.

 

Lo profesor d’istòria qu’es estat decapitat, Samuel PATY fasiá pas que son trabalh. Voliá ensenhar a sa classa d’enfants la libertat de pensar e de mai, de poder exprimir lors pensadas jos la fòrma causida per eles, en lor anma e consciéncia.

 

Òm merita pas la mòrt per aquò. Subretot que d’un autre costat, de qué vesèm ¿ Vesèm se desvolopar a travèrs los “Mèdias”, exactament lo contrari : las informacions son passadas a la molineta, trissadas, abans que de nos èsser desliuradas, la meteissa sus totas las cadenas de television, de la premsa e de totas las ràdios.

 

E qué dire de la publicitat qu'envasís a otrança totes aqueles mèdias, e dont podriam dobtar de la sinceritat.

 

Ja, aquò incita a consumir de mai en mai, al revèrs de totes los principis dels ecologistas, que de lor costat, se baton per una consumacion un pauc mai rasonabla, amb la tòca d’estalviar las ressorsas e lo clima de nòstra planeta. Mas aquò es una autra istòria. E cada marca vanta son produch. Òm vos lo ditz, pas besonh de vos copar la tèsta, aquel produch es lo melhor, lo mens car, lo mai bèl, eca...

 

Los mai expausats son los enfants, encara simplasses, qu’engolisan aquelas informacions tant ben maquilhadas. Es verai qu’òm rasteleja pas sus los mejans per las far passar. Aquò s’apèla  pensada unenca, o encara  borratge de clòsca ¡

 

Lo mond que fan aqueles mestièrs an d’engenh. Se podián lo metre al servici d’autres ensenhaments, mai saberuts, quant de temps seriá ganhat ¡ Al contrari, benlèu sens se ne trachar, al nom de l’economia, demolissan lo trabalh qu’aquel profesor e tant d’autres s’esperfòrçan de far.

 

Coma òm lo vei, i a encara de trabalh per contrabalançar la situacion.

 

Vertadièrament, i a quicòm que truca.

 

 

Anem, m’arrèsti aqui per uèi, que vòli pas passar per la vièlha repotegaira del quartièr.

 

Mas, vertadièrament, i a quicòm que truca...

 

Yvonne BEAUME.

MÈSA lo 24 D'OCTÒBRE DE 2020.