Libres novèls

 La cronica Midi Libre dau Joan Loís Blenet

 

La nòstra lenga occitana es de granda tradicion literària e aquò contunha amb una vòlha bèla. Avèm urosament de libres novèls a se metre sota la dent. Coma avèm gaire de mèdias per publicitar los escrivans d’òc es gaireben un dever per aquesta cronica d’o faire un pauc. Demest los editors nòstres l’IEO (Institut d’Estudis Occitans) s’acara cada annada de sortir una plega novèla. Ongan 2 son de policièrs de la plan nomenada colleccion Crimis : Joan Ganhaire, un autor fòrça seguit e presat qu’es de Pèirigòrd nos balha « Vent de sable » una novèla enquèsta dau comissari Darnaudguilhem. Puèi lo saberut Florian Vernet de Besièrs nos balha « Metaf (r) iccion a Collisioncity », un polar descabestrat e fantasierós que mescla amb bonur vitessa e umor. Dins la prestigiosa colleccion A Tots lo provençau Romieg Jumèu sortís « La granda Timonariá », un roman d’aventuras istoricas. E per completar la plega 2020 « Dança amb los Voltres » de SèrgiViaule, mai literari, amb 24 tèxtes dins una pròsa sempre poetica e umoristica. Vaquí de qué legir, brave monde. Los podètz trapar en cò de Sauramps au Clapàs qu’a lo meriti bèl d’aver un sector occitan ric amb un librari conoisseire que parla la lenga ! Si que non anatz al sit d’IEO Edicions :www.ieo-edicions.com Lo pagament i es securizat !

 

Traduction à retrouver sur Midilibre.fr