PAPIERÒT MENERBÉS (in La Semaine du Minervois, 29/10/20)

 MAMELHATGES D’OCTÒBRE

Informacions e novèlas de res o d’importància notadas d’aicí e d’ailà :

• La feda negra e lo tiron blanc : Dins cada tropèl de fedas blancas, se trapa una feda negra. Lo Joan Bodon la vos presentèt dins Lo Libre dels Grands Jorns. Jol Pont Vièlh, nadan sus Aude un dotzenat de tirons. Son totes de plumas grisas, maurèlas e verdas, levat un qu’es tot blanc. Pensatz que la feda negra e lo tiron blanc son afiliats al meteis sendicat o a la meteissa ONG ?

• Gaston, mesfisa-te ! : Sufís pas d’arribar en quart de finala a Rotland-Garròs, lo Gastonet de Tolosa : te cal èsser encara mai fòrt que lo Riton menaça de tornar jogar la Copa Davís quand aurà acabat de venir magrinèl amb son regime Comme j’aime !

• Manca de coëréncia : Dins un mesadièr de Lauragués, sus una dobla pagina : una pagina de publicitat per un grand ostal de caçolet, una mièja-pagina sus la Confrariá del caçolet e una mièja-pagina sus… lo regime vegetarian-un modèl alternatiu a l’existéncia milenària !!!

• Per la diversitat linguistica : Estacada a la diversitat linguistica, la direccion de l’estacion France-Bleu-Toulouse demanda que se passe pas cançons en lenga nòstra dins la corteta emission occitana que difusa !!!

• Monolinguisme : Un responsable dels Republicans vòl pas que s’ensenhe l’arab que la prioritat es lo francés, lo francés, lo francés… An totjorn pas comprés qu’aprene una lenga ajuda a comprene e saber las autras.

• Formulas : Unas plancardas dins las manifestacions Per Que Viscan Nòstras Lengas del 10 d’octòbre : Blanquer m’a tuar ! ; Blanquer, lo Covid de las lengas. Mas se i aviá que Blanquer seriá un mendre mal. Lo còp passat al Panteon, lo president Macron tornèt cantar la beutat de l’edicte de 1539 de Villers-Cotterets ont l’Estat va pagar la refeccion del castèl. De sòuses que probable pòt pas botar a pagar ensenhaires d’occitan, catalan, breton, basc…

• Visca Cabrèl : Lo Francis Cabrèl ven de sortir un disc novèl ont interprèta una cançon amb d’occitan. A la television, declarèt : « Lo francés a tot esclafat e, de mai, tot aquò es fòrça centralizat. Nos cal tornar trapar nòstres caractèrs prigonds, cada contrada ten sas costumas, sa lenga, sa cosina, sos païsatges. Se cal apiejar aquí-sús. Aqueste disc l’ai fait per aquò. Soi del Sud, pertot es l’occitan. A mon entorn, monde se baton per la lenga occitana e soi amb eles ».

• Expression : De mancar pas, la serada d’aqueste dimars 3 de novembre al Teatre de Narbona amb una discutida (18h) sus la diversitat linguistica en dangièr, seguida d’una creacion de la Mal-Cofada : Roge.

• Paraulas d’Òc tanben : En aquesta debuta de novembre a Puègnautièr (sala Na Loba) amb unas lecturas de poèmas de Leon Còrdas Dire son si (diluns 2, 18h30), un moment pel jove public Contes de la galina (dimècres 4, 15h) e una conferéncia borlesca d’interés occitan del Teatre de las Originas Martror/Totsants suls rites e fèstas a l’entorn de la Mòrt e las relacions amb l’autre monde (dijòus 5, 18h30).

Mamelhaire Roch