L’ESSENCIAL E PAS MAI…
Aquel virús nos rosega la vida e nos va desbarrutar las cervèlas, las relacions e lo biais de viure. Vaquí que lo governament de França se bota a decidir çò qu’es essencial o pas, çò que se pòt anar crompar als comerçants de ta carrièra, de ton barri, de ton vilatge o cò dels ipèr-supermercats e çò que las grandas entrepresas chuca-monedas mondializadas sens fe ni lei (levat la del mercat, del pòrtafuèlha e de las estòc-opcions) te pòdon menar a ta pòrta.
Tièra establida entre ministres, especialistas de sabes pas tròp de qué e sens concertacion amb los concernits que, se ne vira, poirián aver quauquas idèias sus l’anar de las causas e las solucions de trapar. Tot es de mal comprene, alara, pensi pas qu’arribarai a vos explicar, d’un biais pedagogic clar e segur, çò que sabi pas brica dins aquesta cronica !
Doncas, a la sortida del confinhament, dins un mes o per l’an pebre, unas consequéncias de las mesuras presas poirián èsser :
( NB – es de latin : Nota Bene, vos cal notar — pas la pena de recercar lo vòstre Gaffiòt vièlh, del temps de Ciceron, de Cesar e de la guèrra de las Gaulas : vos pòdi pas dire aquò amb de flors, que la venda n’es interdita. Alara, vos fasètz lo ramelet solet.a dins lo limit de vòstra ora de sortida e de vòstre quilomètre de passejada).
- La pudeson de la populacion vist que la venda de perfums es interdita, i comprés la dels perfums que pudisson. Lo pacholi passarà pas !
- N’aurem acabat amb aquela istòria bufèca d’Òme-Nadal, inventada fa un sègle per Coca-Cola : l’entrepresa del Barbut grand aurà fait quincanèla amb cap de venda e cap de distribucion de joguina en 2020. Las usinas de reciclatge se fretan ja las mans de tota aquela massa de plastica, de ferralha, d’elements electrics de recondicionar. Se ne vira, ne poiràn fargar… de joguinas !
- Caminarem vestits de pèls de bèstia o amb los ridèus de la cosina arrancats qu’es pas mai question d’anar crompar camisas, pantalons, caucetas, raubas, brocats… E coma i a de mens en mens de caçaires, que las finèstras de la cosina son escuresidas d’un còp de pintura blanca o de ridèus electrics, serà aqueste còp lo retorn de l’an 01 e tornarem trapar la nusetat originala del temps de l’Adam e de l’Èva (bona novèla : i aurà de pomas per manjar !). E aurem pas brica freg, en rason del rescalfament climatic que, fin finala, se revelarà èsser una bona causa (lausenja siague faita al president Trompeta que totjorn presiquèt aquel rescalfament de las relacions entre los umans e la Natura, tant e tant que lo pauròt ne perdèt lo compte de las voses).
- Vos ai gardat per la fin, vos en dobtatz, vos que me legissètz — es fòl çò que pòt faire lo manca de lectura ! : la barradura de las librariás vist doncas que lo libre es (indicatiu, afirmatiu : cal quichar e pas se contentar del condicional : seriá) non-essencial ! E aquí te demandas se tot aquel afar que nos tomba sul cap es vertadièr o solament una cachavièlha : un grand jòc de ròtle que lo titol generic ne seriá : Farenheit 451.
Essencialista Roch
Cap comentari:
Publica un comentari a l'entrada