La guinhada de Nadau !
sus RÀDIO LENGADÒC. (Picatz sus l'imatge, i tombaretz)
Diga ! Es lo bon Monsur Macronòbis, lo capelan dels Aliscamps de París, qu’a pas d’astre amb sas grèpias de Nadal. Vos sovenètz ? En 2017, la grèva granda dels santons ? - Macron, mon bèl, la grèpia aurà ta pèl ! Macron, n’i a pron, Santons, mas pas colhons ! »
Dins aquel temps los motons n’avián pro d’èsser tonduts e de manjar sonque de bauca ; los pastres volián que lo govèrn, en luòc de far d’autovias de mai en mai grandas, faga desbartassar las dralhas per montar a l’estiva ; la merchanda de cagarauletas ne podiá pas pus de la concurréncia desvergonhada que li fasiá la Borgonha amb sos gròsses cagaraulasses ; l’estamaire trobava pas res pus a estamar e lo pelharòt plorava en causa las borras sinteticas ; lo buòu e l’ase n’avián son confle de remplaçar lo caufatge central e de dormir sus la palha ; los Reis Magues s’èran faches embarrar per la polícia dau costat de Calais qu’avián pas de papièrs e que portavan amb eles de potingas illicitas… Sant-Josèp reclamava un GPS per anar de Nazaret a Betelèm, per lo camin lo mai cort, sens tombar sus los Romans ; la Santa-Verge voliá pas pus pichonar dins un estable que las condicions d’igièna e de seguretat i èran pas reunidas e voliá una cambra a Arnaud de Vilanòva…
E lo bon Monsur Macronòbis ne faguèt una jaunissa.
Vòls que te diga ? Aqueste an es çò mèmes. En mai d’aver sus l’esquina los escrologistas que vòlon pas pus de sapins de boés mas de plastic i a las règlas sanitàrias que t’i tomban dessús. Una bola cada 1m50 e una sola garlanda per aubre ; pas mai de quatre santons a l’encòp dins la grèpia e amb la masqueta ; enebit als pastres de mai de 65 ans ; los Reis que venon de l’endefòra de Schengen deuràn faire una quarantena e aver un tèst negatiu ; la Familha Santa fa assaupre que refusarà los dons en natura : mantèls de vison, adòba de pangolin o de monina, etc… E Pilata ensenharà a totes coma se lavar las mans. E fau coma el.
Es çò que ne dise, ieu !
Cap comentari:
Publica un comentari a l'entrada